රාජ්‍ය ආයතනවල ජ්‍යෙෂ්ඨ නිලධාරීන් විශ්‍රාම යන විට භාවිත කළ නිල වාහන ඔවුන් වෙත ලබාදීමේ ක්‍රියාවලිය නතර කරන ලෙස මහා භාණ්ඩාගාරය රාජ්‍ය ආයතනවලට උපදෙස් දී තිබේ.
මේ සම්බන්ධයෙන් භාණ්ඩාගාර ලේකම් මහින්ද සිරිවර්ධන අමාත්‍යාංශ ලේකම්වරුන්ට සහ රාජ්‍ය බැංකු, සංස්ථා, සභා සහ රාජ්‍ය ආයතන ප්‍රධානීන් වෙත චක්‍රලේඛයක් යවා ඇත.
විශ්‍රාම යාමේදී නිල වාහනවල අයිතිය රාජ්‍ය නිලධාරීන්ට පැවරීම සම්බන්ධයෙන් රාජ්‍ය ආයතන පිළිබඳ කෝප් කමිටුව කළ විමසීම්වලට අනුව මෙම තීරණය ගෙන ඇත.
වාහන පැවරීම සඳහා රජය සතු ව්‍යවසායන් අනුගමනය කරන සියලුම අභ්‍යන්තර ප්‍රතිපත්ති වහාම ක්‍රියාත්මක වන පරිදි අත්හිටුවීමට මුදල් අමාත්‍යාංශය තීරණය කර ඇති බව එම චක්‍රලේඛයේ සඳහන් වේ.
පවතින විදේශ විනිමය අර්බුදය සහ රටේ ආර්ථික තත්ත්වය සැලකිල්ලට ගනිමින් මෙම තීරණය ගෙන ඇත.