දැනට පවතින ගුරු පුරප්පාඩු සඳහා උපාධිධාරීන් 12,000ක් වහාම සේවයට බඳවා ගැනීමට කටයුතු කරමින් සිටින බව අධ්‍යාපන අමාත්‍යාංශය දැනුම් දී තිබේ.
ඊට අදාළ තරග විභාගය ලබන සතියේ පැවැත්වීමට නියමිතයි.
එමෙන්ම මේ සඳහා වන ගැසට් නිවේදනය ළඟදීම ප්‍රකාශයට පත් කරන බව අධ්‍යාපන අමාත්‍යාංශයේ ලේකම් එම්.එන්. රණසිංහ පැවසීය.
දැනට පාසල්වලට අනුයුක්තව සිටින උපාධිධාරීන් ඇතුළු වයස අවුරුදු 40 ට අඩු රාජ්‍ය සේවා උපාධිධාරීන්ට මේ සඳහා අයදුම් කිරීමට අවස්ථාව ලබාදී ඇති බව එම අමාත්‍යාංශය සඳහන් කර ඇත.
විද්‍යාව, ගණිතය, තාක්ෂණවේදය සහ සෞන්දර්ය විෂයයන් සඳහා ගුරු පුරප්පාඩු ඇත. මධ්‍යම තරග විභාගය කඩිනමින් පවත්වා නවක ගුරුවරුන් අප්‍රේල් මාසයට පෙර සේවයට බඳවා ගැනීමට සැලසුම් කර ඇති බව අධ්‍යාපන අමාත්‍යාංශය සඳහන් කරයි.