පළාත් පාලන ඡන්ද විමසීම සඳහා තරග වැදීමට නියමිත අපේක්ෂකයින්ගෙන් නැවත දැනුම් දෙන තුරු ඇප තැන්පතු බාර නොගන්නා ලෙස රාජ්‍ය පරිපාලන අමාත්‍යංශයේ ලේකම්වරයා විසින් තේරීම් භාර නිලධාරීන් වෙත නිකුත් කර තිබෙන ලිපිය බලරහිත කිරීමේ නියෝගයක් නිකුත් කරන ලෙස ඉල්ලා ශ්‍රේෂ්ඨාධිකරණය හමුවේ රිට් පෙත්සමක් ඉදිරිපත් කර තිබෙනවා.
සමගි ජන බලවේගයේ මහලේකම් පාර්ලිමේන්තු මන්ත්‍රී රංජිත් මද්දුමබණ්ඩාර මහතා විසිනුයි පෙත්සම ඉදිරිපත් කර ඇත්තේ. එහි වගඋත්තරකරුවන් ලෙස අමාත්‍ය මණ්ඩල ලේකම්වරයා, රාජ්‍ය පරිපාලන අමාත්‍යංශයේ ලේකම් නීල් බන්ඩාර හපුහින්න, අග්‍රාමාත්‍යවරයා ඇතුළු අමාත්‍ය මණ්ඩල සාමාජිකයින්, මැතිවරණ කොමිසමේ සභාපති නීතීඥ නිමල් පුංචිහේවා ඇතුළු එහි සාමාජිකයින්, දිවයිනේ සියලුම තේරීම් භාර නිලධාරීන්, නීතිපතිවරයා ඇතුළු 85 දෙනෙකු නම් කර තිබෙනවා.
පෙත්සම්කරු පෙන්වා දෙන්නේ ඊයේ (10) වනදා අමාත්‍ය මණ්ඩලය විසින් ගනු ලැබූ තීරණයකට අනුව පළාත් පාලන ඡන්ද විමසීම සදහා තරඟ වැදීමට නියමිත අපේක්ෂකයින්ගෙන් ඇප තැන්පතු බාර නොගන්නා ලෙස දන්වමින් රාජ්‍ය පරිපාලන අමාත්‍යංශයේ ලේකම්වරයා විසින් දිවයිනේ සියලුම තේරීම් භාර නිලධාරීන් වෙත ලිපියක් නිකුත් කර ඇති බවයි.
මෙවැනි ලිපියක් නිකුත් කිරීම මුළුමනින්ම නීතියට පටහැනි යැයි පෙන්වා දෙන පෙත්සම්කරු මේ හරහා ජනතාවගේ සර්වජන ඡන්ද අයිතිය සහ ආණ්ඩුක්‍රම ව්‍යවස්ථාව යටතේ සහතික කර තිබෙන මූලික මිනිස් අයිතිවාසිකම් උල්ලංඝනය වන බවත් පෙන්වා දෙනවා.
එබැවින් පළාත් පාලන ඡන්ද විමසීම සඳහා තරඟ වැදීමට නියමිත අපේක්ෂකයින්ගෙන් ඇප තැන්පතු බාර නොගන්නා ලෙස රාජ්‍ය පරිපාලන අමාත්‍යංශයේ ලේකම්වරයා විසින් නිකුත් කර තිබෙන ලිපිය බල රහිත කිරීමේ රිට් ආඥාවක් නිකුත් කරන ලෙසද පෙත්සමෙන් ඉල්ලා තිබෙනවා.
ඊට අමතරව එම ලිපියට අනුව කටයුතු කිරීමෙන් වළකින ලෙස දන්වා දිවයිනේ තේරීම් භාර නිලධාරීන් වෙත නියෝග නිකුත් කරන ලෙසද පෙත්සමෙන් ඉල්ලා තිබුණා. එමෙන්ම මෙම පෙත්සම විභාග කොට අවසන් තීන්දුවක් ප්‍රකාශයට පත් කරන තුරු රාජ්‍ය පරිපාලන අමාත්‍යංශයේ ලේකම්වරයා විසින් නිකුත් කර තිබෙන අදාළ ලිපිය ක්‍රියාත්මක කිරීම වැළැක්වීමේ අතුරු නියෝගයක් නිකුත් කරන ලෙසද පෙත්සමින් වැඩිදුරටත් ඉල්ලා තිබෙනවා.