ලංකා ඛනිජතෙල් නීතිගත සංස්ථාව විසින් අලෙවි කරන පෙට්‍රල් හා ඩීසල් ඉන්ධනවලින් ලාභ ලබන බව විෂයභාර අමාත්‍ය කංචන විජේසේකර පවසනවා.
මේ අනුව ඔක්ටේන් 92 පෙට්‍රල් ලීටරයකින් රුපියල් 16.21ක්, ඔක්ටේන් 95 පෙට්‍රල් ලීටරයකින් රුපියල් 109.44ක්, ලංකා ඔටෝ ඩීසල් ලීටරයකින් රුපියල් 3.25ක්, සුපිරි ඩීසල් ලීටරයකින් රුපියල් 11.64ක් සංස්ථාව ලාභ ලබයි.
නමුත් සංස්ථාව අලෙවි කරන සෑම භූමිතෙල් ලීටරයකින් රුපියල් 21.49ක අලාභයක් ලබන බවද අමාත්‍යවරයා සඳහන් කරයි.මෙම ලාභ / අලාභ ගණනය කිරීම පසුගිය 18දාට අදාළ වෙයි.
කෙසේවෙතත් මෙම ලාභ/අලාභවලට අමතරව පෙට්‍රල් හා ඩීසල්වලින් රජය අයකරන බදු හේතුවෙන්ද රජය විශාල ආදායමක් උපයනු ලබයි. මේ අනුව 92 පෙට්‍රල් ලීටරයකින් රුපියල් 82 ක්, ඔක්ටේන් 95 පෙට්‍රල් ලීටරයකින් රුපියල් 102.88 ක්, ලංකා ඔටෝ ඩීසල් ලීටරයකින් රුපියල් 59.25ක්, සුපිරි ඩීසල් ලීටරයකින් රුපියල් 87.15ක් ලෙස රජය බදු අයකරනු ලබයි.
මේ අනුව ඉන්ධන ලීටරයකට රජය අයකරන ලාභාංතිකය හා බදු අනුව රජයට විශාල ආදායමක් ලැබෙයි. ඒ අනුව පිළිවෙළින් 92 පෙට්‍රල් ලීටරයකින් රුපියල් 98.21 ක්, ඔක්ටේන් 95 පෙට්‍රල් ලීටරයකින් රුපියල් 212.32 ක්, ලංකා ඔටෝ ඩීසල් ලීටරයකින් රුපියල් 62.5ක්, සුපිරි ඩීසල් ලීටරයකින් රුපියල් 98.79ක් ලෙස රජයට ආදායමක් ලැබෙයි.