පිහියකින් ඇන පුද්ගලයෙකු මරා දැමීමේ චෝදනාවට වරදකරුවන් කෙරුණු පුද්ගලයින් 4 දෙනෙකුට කොළඹ මහාධිකරණය අද මරණ දඬුවම නියම කළා.
කොටහේන ප්‍රදේශයේ පදිංචිකරුවන් 4 දෙනෙකුටයි කොළඹ මහාධිකරණ විනිසුරු මහේන් වීරමන් විසින් මෙලෙස දඬුවම් නියම කරනු ලැබුවේ. තීන්දුව ප්‍රකාශයට පත් කරමින් මහාධිකරණ විනිසුරුවරයා සඳහන් කළේ විත්තිකරුවන්ට එරෙහිව එල්ල කර තිබෙන චෝදනා පැමිණිල්ල විසින් සාධාරණ සැකයකින් තොරව ඔප්පු කර තිබෙන බවයි.
ඒ අනුව ඔවුන්ට මෙම දඬුවම් නියම කරන බවත් විනිසුරුවරයා සඳහන් කළා. 2003 වසරේ ජුනි මස 07 වැනි දින හෝ ඊට ආසන්න දිනකදී සිදු වූ අදාළ ඝාතනය සම්බන්ධයෙන් විත්තිකරුවන් 4 දෙනෙකුට එරෙහිව නීතිපතිවරයා විසින් නඩු පවරා තිබුණා.
මෙම නඩුවේ එක් විත්තිකරුවකු අධිකරණය මගහැර සිටින අතර ඔහු අත්අඩංගුවට ගෙන ඉදිරිපත් කරන ලෙසට ද විනිසුරුවරයා විසින් වරෙන්තුවක් ද නිකුත් කර තිබෙනවා.