අම්බලන්තොට ප්‍රදේශයේ පාලමක් මතින් කාන්තාවක් වලවේ ගඟට පැන ඇති බව වාර්තා වනවා.
අද (03) පෙරවරුවේ එම කාන්තාව මෙලෙස පාලමෙන් පැන ඇති අතර, එම අවස්ථාවේ අසළ සිටි බෝට්ටුකරුවෙකු විසින් ඇයව බේරාගෙන ඇති බවයි අම්බලන්තොට පොලිසිය සඳහන් කළේ.
පාලම මතින් වලවේ ගඟට පැන්න කාන්තාව මීටර් දෙසීයක් පමණ පහළට ගසාගෙන ගොස් ඇති අතර, එම අවස්ථාවේ ගඟ හරහා යාත්‍රා කළ ඔරුව සිටි අයෙක් කාන්තවගේ කෙස් වැටියෙන් අල්ලා ඇයව බේරාගැනීමට කටයුතුකර තිබෙනවා.
ජලයේ ගසාගෙන යන අවස්ථාවේ දී ඇයව බේරාගැනීමට ආධාරක කිහිපයක් ලබාදුන් නමුත් කාන්තාව විසින් ඒවා සියල්ල ප්‍රතික්ෂේප කළ බවයි බෝට්ටුවේ සිටි පිරිස පවසන්නේ.
කාන්තාව ගඟට පැන ඇති ස්ථානය කිඹුලන් ගහන ස්ථානයක් බවයි ප්‍රදේශවාසීන් සඳහන් කළේ.
මෙලෙස සියදිවි නසාගැනීමට උත්සාහ කර ඇත්තේ අම්බලන්තොට, පුහුල්යාය ප්‍රදේශයේ පදිංචිකාරිනියක් වන අතර, ඇය අම්බලන්තොට රජයේ රෝහලට ඇතුළත් කිරීමටයි කටයුතු කර ඇත්තේ.
කාන්තාව මෙලෙස ගඟට පැන්න හේතුව මෙතෙක් අනාවරණය වී නැහැ.