තමා ජර්මනියේදී මාලදිවයින සම්බන්ධයෙන් කළ ප්‍රකාශය සමාජ මාධ්‍ය හරහා වැරදි ලෙස අර්ථකතනය කර ඇති බවත් මේ පිළිබඳව කිසියම් අපහසුතාවයකට පත්වූයේ නම් ඊට සමාව අයදින බවත් සංචාරක අමාත්‍ය හරීන් ප්‍රනාන්දු පවසයි.
අමාත්‍යවරයා ට්විටර් පණිවිඩයක් නිකුත් කරමින් මේ බව සඳහන් කර තිබේ.
පසුගියදා බර්ලින් නුවර පැවති සංචාරක වැඩසටහනකදී මාලදිවයින සහ ශ්‍රී ලංකාව සංසන්දනය කරමින් අමාත්‍යවරයා අදහස් දැක්වූ අතර ට්විටර් පණිවිඩ නිකුත් කරමින් එම ප්‍රකාශයට එරෙහිව මාලදිවයිනේ සංචාරක අමාත්‍ය අබ්දුල්ලා මව්සූම් මෙන්ම තවත් පාර්ලිමේන්තු මන්ත්‍රීවරයෙකු ප්‍රතිචාර දක්වා තිබේ.
එමගින් ඔවුන් පෙන්වා දී තිබුණේ, පසුගිය වසර 3ක කාලය තුළ මාලදිවයින ලොව හොදම සංචාරක ගමනාන්තය බවට පත්වෙමින් සම්මානයටද පාත්‍රවූ බවයි.
ඒ සම්බන්ධයෙන් ඊර්ෂ්‍යාවක් හෝ සැකයක් ඇත්නම් නැවත නැවතත් කණ්ණාඩියක් ඉදිරිපිටට ගොස් විමසන ලෙස මාලදිවයිනේ සංචාරක අමාත්‍ය අබ්දුල්ලා මව්සූම් සිය ට්විටර් පණිවිඩයේ දැක්වෙයි.