ශ්‍රී ලංකාව මේ වනවිට දරුණුතම මූල්‍ය අර්බුදයට මුහුණ දෙන බැවින් මේ වසරේදී මෙරට ආර්ථික වර්ධනය සියයට 03කින් පහළ යනු ඇතැයි Moody’s Investors Service පුරෝකථනය කර ඇත.
ශ්‍රී ලංකාවේ මූල්‍ය අර්බුදය එහි විදේශ විනිමය සංචිතවල තියුණු පහත වැටීමකට හේතු වී තිබේ.
කෙසේ වෙතත්, 2024 දී ආර්ථික වර්ධනය නැවතත් ඉහළ යනු ඇතැයි අපේක්ෂා කෙරේ.
ශ්‍රී ලංකාව සිය සිව්වන කාර්තුවේ සහ පූර්ණ වර්ෂ වර්ධන ප්‍රතිශතය මෙම සතිය අගදී නිකුත් කිරීමට ඉඩ ඇති බව සංඛ්‍යාලේඛන දෙපාර්තමේන්තුව පවසයි.
මේ අතර ජාත්‍යන්තර මූල්‍ය අරමුදල විසින් ලබාදීමට නියමිත ඩොලර් බිලියන 2.9ක ණය මාර්තු 20 වැනිදා අනුමත කිරීමට ඉඩ ඇති බවයි පැවසෙන්නේ.
Moody’s Investors Service පැවසුවේ එය ධනාත්මක ප්‍රතිලාභයක් බවයි. ආර්ථික ප්‍රකෘතිය පවත්වා ගැනීමට සහ සමාජ අභියෝග අවම කර ගැනීමට අවශ්‍ය ආහාර, ඉන්ධන සහ අමුද්‍රව්‍ය ඇතුළු අත්‍යවශ්‍ය භාණ්ඩ ආනයනය කිරීමට මෙමගින් ඉඩ ලබා දෙන බව Moody’s වාර්තාවක සඳහන් වේ.
කෙසේ වෙතත්, ශ්‍රී ලංකාව තවමත් සිය ණය ප්‍රතිව්‍යුහගත කළ යුතුව ඇත. එහි විවිධ ණය ගැතියන් සංචිතය අනුව මෙය දිගින් දිගටම ඇදගෙන යන ක්‍රියාවලියක් විය හැකිය.