මෑතකදී මෙරට ක්‍රිකට් ක්‍රීඩාවට හඳුනාගත් යොවුන් දඟ පන්දු යවන්නෙකු වන වියස්කාන්ත් විජයකාන්ත් හට 2023 IPL තරගාවලියට ඇරයුමක් ලැබී තිබෙනවා.
මේ වනවිට 22 හැවිරිදි වියේ පසුවන වියස්කාන්ත්ට රාජස්ථාන් රෝයල්ස් කණ්ඩායමේ මෙම අවස්ථාව උදාකර දී ඇති බවයි වාර්තා වුණේ. ඒ අනුව මෙවර ඉන්දීය ප්‍රිමියර් ලීග් තරගාවලිය තුළ දී රාජස්ථාන් රෝයල්ස් කණ්ඩායම වෙනුවෙන් පුහුණුවීම් අතර තුර නෙට් පන්දු යවන්නෙක් ලෙස කටයුතු කිරීමටයි අවස්ථාව හිමිව ඇත්තේ.
මේ අතර වියස්කාන්ත් විජයකාන්ත්ගේ ප්‍රියතම ක්‍රීඩකයා වන ඉන්දීය සුපිරි දඟ පන්දු යවන ක්‍රීඩක රවීචන්ද්‍රන් අශ්වින් යටතේ ද කටයුතු කිරීමට මෙවර තරගාවලියේ දී ඔහුට අවස්ථාව හිමිව තිබෙනවා.
මෙවර තරගාවලිය තුළ රාජස්ථාන් රෝයල්ස් කණ්ඩායමේ ප්‍රධාන පුහුණුකරු ලෙස කුමාර සංගක්කාර කටයුතු කරන අතර වේගපන්දු යැවීමේ පුහුණුකරු ලෙස කටයුතු කරන්නේ ලසිත් මාලිංගයි.