අරගලය පැවති සමයේ අරලියගහ මන්දිරයට ඇතුළු වී එහි දේපල විනාශ කිරීමේ සිද්ධියට අදාළව මන්දිරයේ තිබූ ලේ සාම්පල් පහක් සම්බන්ධයෙන් වන වාර්තා අධිකරණයට ඉදිරිපත් කරන ලෙස කොළඹ කොටුව මහේස්ත්‍රාත් තිළිණ ගමගේ මහතා අද (22) රජයේ රස පරීක්ෂකවරයාට නියෝග කළේය.
මෙම සිද්ධියට අදාළ පරීක්ෂණ සිදුකරන අවස්ථාවේදී අරලියගහ මන්දිරයේ තිබූ මෙම ලේ සාම්පල් පහ සම්බන්ධයෙන් රජයේ රස පරීක්ෂකවරයා වෙත යවා වාර්තා කැඳවිය යුතු බැවින් ඒ සඳහා නියෝග නිකුත් කරන ලෙසට අපරාධ පරීක්ෂණ දෙපාර්තමේන්තුව කළ ඉල්ලීමක් සැලකිල්ලට ගත් මහේස්ත්‍රාත්වරයා මෙම නියෝගය නිකුත් කළේය.
අරලියගහ මන්දිරය ඉදිරිපිට සහ ගාලු මුවදොර පිටියේ පැවති සාමකාමී විරෝධතා ව්‍යාපාරවලට ඉකුත් 2022 වසරේ මැයි මස 09 වැනිදා පහර දීමේ සිද්ධියට අදාළ පරික්ෂනය අධිකරණය හමුවේ අද (22) යළි කැඳවූ අවස්ථාවේදී මෙම කරුණු ඉදිරිපත් විණි.