ලාඕසයේ විශේෂිත කලාපයක කොටු වී සිටියදී බේරා ගත් ශ්‍රී ලාංකික තරුණයන් 24 දෙනෙකු කටුනායක ගුවන්තොටුපළ වෙත රැගෙන විත් තිබෙනවා.
පරිගණක ක්ෂේත්‍රයේ රැකියා සඳහා ගොස් සිටි මෙම තරුණයන් 24 දෙනා, තමන්ට පැවරූ පරිගණක මූල්‍ය වංචා සිදු නොකිරීම හේතුවෙනුයි එරට විශේෂිත කලාපයක කොටු වී සිට ඇත්තේ.
මොවුන් හම්බන්තොට සහ ගාල්ල ඇතුළු දකුණු පළාත නියෝජනය කරන පරිගණක පිළිබඳ වැඩිදුර අධ්‍යාපනය ලැබූ තරුණයන් පිරිසක් බව සඳහන්. ඔවුන් මීට මාස 04 කට පමණ පෙර ලාඕසයේ ‘බොකියෝ’ (Bokio) හි, චීනය විසින් පාලනය කරනු ලබන රන් ත්‍රිකෝණයේ, විශේෂිත ආර්ථික කලාපයේ (Special Economic Zone) පරිගණක ක්ෂේත්‍රයේ රැකියා සදහා ව්‍යාපාරික වීසා යටතේ ශ්‍රී ලංකා විදේශ සේවා නියුක්ති කාර්යාංශයේ ලියාපදිංචි නොවී පිටත්ව ගොස් තිබෙනවා.
එහිදී මෙම කලාපයට ඇතුළු වීමේදී ඔවුන්ගේ ගුවන් ගමන් බලපත්‍ර, ජංගම දුරකථන සහ අනෙකුත් වටිනා ලියකියවිලි සියල්ල තරුණයන් රැගෙන ගිය සමාගම විසින් සිය භාරයට ගෙන ඇතැයි සඳහන්.
පසුව මෙම විශේෂිත කලාපය තුළ පිහිටි සමාගමේ කාර්යාලය වෙත රැගෙන ගිය ශ්‍රී ලාංකිකයන් පිරිසට විවිධ ගිණුම් ක්‍රම භාවිතා කරමින් මෙම කලාපය තුළ විවිධ ආයෝජන අවස්ථා පවතින බව පෙන්වා දී, ඒ පිළිබඳව උනන්දුවක් දක්වන්නන්ගෙන් අන්තර්ජාලය ඔස්සේ මුදල් වංචනිකව ලබා ගැනීමට කටයුතු කරන ලෙසටයි දන්වා ඇත්තේ.
මෙම කටයුත්ත ප්‍රතික්ෂේප කළ ශ්‍රී ලාංකික තරුණයන් පිරිසට, මෙම විශේෂිත ආර්ථික කලාපයෙන් පිටවීමට හෝ මෙම සිදුවීම පිළිබඳව ශ්‍රී ලංකාවට හෝ බාහිර ලෝකය දැනුවත් කිරීමට අවස්ථාවක් ලබා නොදී සිරගත තත්වයකට පත් කිරීමට අදාළ සමාගම පියවර ගෙන තිබෙනවා.
එහෙත් පරිගණක පිළිබඳව මනා නිපුණත්වයක් ඇති මෙම ශ්‍රී ලාංකික තරුණයන් පිරිස මෙම බාධක මැඩලමින් දැඩි ප්‍රයත්නයක් දරා මෙම සියලු සිදුවීම් ලොවට හෙළි කිරීමට පියවර ගෙන තිබුණා.
ලාඕසයේ ශ්‍රී ලංකාව නියෝජනය කරන තානාපතිවරයෙකු නොමැති අතර, ඒ වෙනුවට ගරු දූත සේවා නිලධාරීවරයෙකු වශයෙන් දමිත් අලුත්ගේ මහතායි කටයුතු කරමින් සිටින්නේ.
ඔහු සහ ශ්‍රී ලංකාවේ ‘මගෙන් රටට’ සිවිල් සංවිධානයේ සභාපති සංජය මහවත්ත මහතා එක්ව දැඩි ප්‍රයත්නයක් දරා මෙම තරුණයන් පිරිස මෙම කලාපයේ අදාළ සමාගමෙන් බේරාගෙන යළි ශ්‍රී ලංකාවට ගෙන ඒමට කටයුතු කර තිබෙනවා.
ඒ අනුව මෙම තරුණයන් පිරිස ලාඕසයේ සිට තායිලන්තයේ බැංකොක් වෙත පැමිණ, එහි සිට අද උදෑසන 10.20ට ශ්‍රී ලන්කන් ගුවන් සේවයේ UL- 403 දරන ගුවන් යානයෙන් කටුනායක ගුවන්තොටුපළ වෙත පැමිණ සිටියා.