කුරුණෑගල මලියදේව බාලිකා විද්‍යාලයේ උසස් පෙළ හදාරමින් සිටියදී හදිසියේ ඇති වූ රෝගී තත්ත්වයකින් මොළය මියයෑම හේතුවෙන් මරණයට පත්වූ 19 හැවිරිදි විහඟනා ආරියසිංහ නම් දැරියගේ අවයව 07ක් පුද්ගලයන් 07 දෙනෙකුට දන්දීම ගැන අපූරු පුවතක් වාර්තා වෙයි.
මෙම සුවිශේෂී සැත්කම පසුගියදා කොළඹ ජාතික රෝහලේදීයි සිදුකර ඇත්තේ.
ඒ අනුව මෙම දැරියගේ හදවත සහ පෙනහළු දෙක නිර්වින්දන විශේෂඥ වෛද්‍යවරියකට බද්ධ කර තිබේ. මෙම වෛද්‍යවරියගේ හෘදය හා පෙනහළු අකර්මණ්‍ය වීමෙන් දැඩි අසාධ්‍ය තත්ත්වයෙන් ඇය පසු වී තිබේ.
විහඟනාගේ සිරුරෙන් අවයව ලබාගන්නා අවස්ථාවේ දී පාය භාගයක පමණ කාලයක් කොළඹ ජාතික රෝහලේ විදුලිය විසන්ධි වී තිබුණ ද එය බාධාවක් කර නොගත් වෛද්‍යවරු ඉතා සාර්ථකව එම කාර්ය සිදුකර තිබුණි.
මීට අමතරව ඇයගෙන් ලබාගත් වකුගඩු දෙක අසාධ්‍ය රෝගීන් දෙදෙනෙකුට සාර්ථකව බද්ධ කර ඇති අතර ඇයගේ අක්මාව සහ අක්ෂි පටල ද තවත් පුද්ගලයන් තිදෙනෙකුට නිරෝගි ජීවිතයක් ලබාදීමට උපකාරී වී තිබේ.
තවත් කිහිප දෙනෙකුටම නිරෝගීව ජීවත් වීමේ වරම් ලබාදෙමින් අවසන් ගමන් ගිය මෙම දැරිය අන් අයටද මහත් ආදර්ශයක් බව කිව යුතුමය.