විශේෂ කාර්ය බලකාය අරලගංවිල කඳවුරේ නිලධාරීන්ට ලද තොරතුරකට අනුව දෙහිඅත්තකණ්ඩිය නව නගරය ප්‍රදේශයේ කළ වැටලීමකින් අනවසරෙන් නිධන් කැණිම් කරමින් සිටි පුද්ගලයින් නව දෙනෙකු අත්අඩංගුවට ගෙන තිබෙනවා.
එහි දි බලපත්‍ර නොමැතිව පරිසරයට හානි වන ලෙස පුරාවිද්‍යා වටිනාකමක් ඇති භාණ්ඩ සොයා ගැනීමේ අරමුණින් අනවසරයෙන් මහවැලි අධිකාරියට අයත් ඉඩමක මොවුන් මෙලෙස කැණීම වල නිරත වී ඇති බව පොලිසිය සඳහන් කරනවා.
සැකකරුවන් දෙහිඅත්තකණ්ඩිය සහ මහියංගනය යන ප්‍රදේශ වල පදිංචි වයස අවුරුදු 23 සිට 51 දක්වා පසුවන්නන්.
මෙම වැටලීමේ දී අත්අඩංගුවට ගත් පිරිස සහ නිධන් හෑරීම් සදහා යොදාගන්නා උපකරණ ද සමඟ වැඩිදුර විමර්ශන කටයුතු සඳහා දෙහිඅත්තකණ්ඩිය පොලිස් ස්ථානය වෙත භාරදී තිබෙනවා.