පසුගිය උත්සව සමයේදී බිත්තර සම්බන්ධයෙන් සිදුකරන ලද වැටලීම්වලදී ව්‍යාපාරිකයින් පස් දෙනෙකුට රුපියල් ලක්ෂය බැගින් ලක්ෂ පහක දඩ මුදලක් ගෙවීමට අධිකරණය නියෝග කර තිබේ.
බදුල්ල දිස්ත්‍රික් පාරිභෝගික කටයුතු පිළිබද අධිකාරියේ ජ්‍යෙෂ්ඨ විමර්ශන නිළධාරී ශාන් යාපාරත්න සදහන් කළේ බදුල්ල, වැළිමඩ සහ බණ්ඩාරවෙල අධිකරණයන් වෙත ඉදිරිපත් කළ ව්‍යාපාරිකයින් පස් දෙනෙකුට මෙසේ දඩ නියම වී ඇති බවයි.
මෙම ව්‍යාපාරිකයින් පස් දෙනාට අමතරව නඩු පවරා ඇති තවත් ව්‍යාපාරිකයින් තිස් පස් (35) දෙනෙකු ඉදිරි දින කිහිපය තුළදී අධිකරණයට ඉදිරිපත් කිරීමට නියමිත බවයි ඒ මහතා වැඩිදුරටත් සඳහන් කළේ.
බිත්තර වැඩි මිලට අලෙවි කිරීම, බිත්තර සඟවා තැබීම, සන්තකයේ තබාගෙන නැතැයි පැවසීම ආදී වැරදි මත මෙම ව්‍යාපාරිකයින් හතලිස් (40) දෙනා බදුල්ල දිස්ත්‍රික්කය තුළදී සිදුකළ වැටලීම්වලදී නීතියේ රැහැනට කොටු කරගෙන තිබුණි.