බස්නාහිර පළාතේ හැර සෙසු සියලු පළාත්වල පාසල් දරුවන්ට ආහාර සැපයීම නතර වී ඇති බව අධ්‍යාපන අමාත්‍ය සුසිල් ප්‍රේමජයන්ත අද (26) පාර්ලිමේන්තුවේදී පිළිගත්තේය.
සැපයුම්කරුවන්ට මුදල් සැපයීමේ ප්‍රමාදය හේතුවෙන් මෙම වැඩසටහන නතර වී ඇති බවත් ලෝක බැංකු අරමුදල ආහාර සැපයුම්කරුවන්ට මේ වර්ෂයේ පෙබරවාරි, මාර්තු මාසවලට අදාළව රුපියල් කෝටි 87 ක මුදලක් ගෙවීමට කටයුතු කරගෙන යන බවත් අමාත්‍යවරයා එහිදී අවධාරණය කළේය.
“සමහර පළාත්වල පාසල් ආහාරය සම්බන්ධයෙන් ගැටලු මතුවෙලා තියෙනවා. විශේෂයෙන්ම දකුණු පළාතේ පෙබරවාරි මාසේ ඉඳලා ආහාර සැපයුම් කරුවන්ට ගෙවීම් කරල නෑ. පෝෂණ වැඩසටහන සඳහා මිලියන දහසය දහසක මුදලක් පළාත් සභාවලට අයවැයෙන් වෙන්කරනු ලැබුවා. පෙබරවාරි මාසේ මිලියන 61 ක් ගෙවලා තියෙනවා. 2021 සියලු හිඟ ගෙවීම් ඉවර කරලා තිබුණා. පළාත් නවයේ පෙබරවාරි මාර්තු මුදල් අවශ්‍යතාවය රුපියල් මිලියන 875ක්. ලෝක බැංකු අරමුදලෙන් ඒ මුදල ඉදිරියේදී ගෙවනවා. ඒ නිසා එම ආහාර සැපයීමේ වැඩපිළිවෙළ නතර වන්නේ නැහැ. ඒක දිගටම යනවා.“