නොර්වුඩ් එල්බඩ පහාල කොටස ද්‍රවිඩ විදුහලට එල්ල වූ බඹර ප්‍රහාරයකින් එම විදුහලේ ඉගෙනුම ලබමින් සිටි සිසු සිසුවියන් හතර දෙනෙකු තුවාල ලබා දික්ඔය ග්ලැන්කන් දිස්ත්‍රික් මූලික රෝහල වෙත ඇතුළත් කර තිබෙනවා.
මෙම තත්වයන් පිළිබඳව කරන ලද විමසීමකදී අදහස් දැක්වූ එම විදුහලේ ගුරුවරයෙකු පවසන ලද්දේ 02 වන දින පාසල පැවැත්වෙන කාලය තුළදී පාසල අසළ ගසක බැඳ තිබූ බඹර කූඩුවක් ඇවිස්සීමෙන් එහි සිටි බඹරුන් විසින් පහර දීමෙන් 11 වසරේ ඉගෙනුම ලබන සිසුවියන් තුන් දෙනෙකු හා එක් සිසුවෙකු තුවාල ලබා ඇති බවත්ය.
එසේ තුවාල ලැබූ එම සිසුන් කඩිනමින් දික්ඔය ග්ලැන්කන් දිස්ත්‍රික් මූලික රෝහල වෙත ඇතුළත් කිරීමට පියවර ගත් බවද ඔහු වැඩිදුරටත් පැවසුවා. මේ පිළිබඳව කරන ලද විමසීමකදි අදහස් දැක්වූ දික්ඔය ග්ලැන්කන් දිස්ත්‍රික් මූලික රෝහලේ නිලධාරියෙකු පවසන ලද්දේ බඹර ප්‍රහාරයෙන් තුවාල ලැබූ සිසුන්ගේ තත්වයන් බරපතල නොවන බවත් එම සිසුන් රෝහලේ නේවාසිකව ප්‍රතිකාර ලබන බවත්ය.