කුවේට් රාජ්‍යයේ රැකියා සඳහා ගොස් සිටි ශ්‍රී ලාංකික කාන්තාවන් 32 දෙනෙක් අද (16) අලුයම එරටින් පිටුවහල් කර කටුනායක ගුවන්තොටුපළ වෙත එවා තිබේ.
රැකියා සඳහා කුවේට් රාජ්‍යයට ගොස එරට නීතිරීති උල්ලංඝනය කරමින් අනීතිකව එරට රැඳී සිටි කාන්තාවන් 32 දෙනෙකුයි මෙලෙස පිටුවහල් කර ඇත්තේ.
මෙම පිරිස ගිවිසුම් ගත රැකියා ස්ථානයෙන් හෝ නිවසෙන් පළා විත් කුවේට් රාජ්‍යයේ පිටස්තර ප්‍රදේශවල රැකියා කරමින් සිටින අතරතුර තමන්ගේ කැමැත්තෙන්ම ශ්‍රී ලංකාව බලා යෑමට තානාපති කාර්යාලය වෙත පැමිණ ලියාපදිංචි වී සිටි ශ්‍රී ලාංකික කාන්තාවන් පිරිසකි.
මෙසේ ශ්‍රී ලංකාව වෙත එවා තිබූ කාන්තාවන් අනුරාධපුරය, වව්නියාව, ගම්පහ, කින්නියා, කොළඹ, කුරුණෑගල සහ පුත්තලම ප්‍රදේශවල පදිංචිකාරිනියන් බවයි වාර්තා වන්නේ.