දේවගැති ජෙරම් ප්‍රනාන්දු සිය ගුරුවරයා සහ ආධ්‍යාත්මික ශාස්තෘවරයා ලෙස හඳුන්වන සිම්බාබ්වේ දේශයේ ඌබට් ඒන්ජල් නැමැති දේවගැතිවරයා ජාත්‍යන්තර රන් ජාවාරම් සහ මුදල් විශුද්ධිකරණයට සම්බන්ධ තැනැත්තෙකු බව අල්ජසීරා රූපවාහිනිය වාර්තාමය වැඩසටහනක් ඔස්සේ අනාවරණය කර තිබේ.
ඔහු ජාත්‍යාන්තර මට්ටමේ රන් ජාවාරම් සහ මුල්‍ය විශුද්ධිකරණයේ යෙදෙන්නෙක් වන අතර රජයේ විශේෂ තානාපතිවරයෙකු ලෙස කටයුතු කරන පුද්ගලයෙක් බවයි විදෙස් රූපවාහිනී මාධ්‍ය වැඩිදුරටත් වාර්තා කරන්නේ.
ඌබට් ඒන්ජල් පසුගිය 2020 සහ 2022 වර්ෂවල දී ශ්‍රී ලංකාවේ සංචාරය කර ඇති අතර මෙම වර්ෂයේ මාර්තු 19 වැනිදා කටුනායක මිරකල් ඩෝම් ශාලාවේදි ඒකාබද්ධ මෙහෙයක් පවත්වා ඇත්තේ දේවගැති ජෙරම් ප්‍රනාන්දු සමඟින් බවයි වාර්තා වී ඇත්තේ.
බුදුන් වහන්සේට සහ තවත් ආගමික විශ්වාසයන්ට නිගරු වන පරිද්දෙන් අදාළ දේවගැතිවරයා සිදු කළ ප්‍රකාශයක් පසුගිය දා මහත් ආන්දෝලනාතමක කාරණයක් වුණා.
ඒ සම්බන්ධයෙන් විවිධ පාර්ශව විසින් දේවගැතිවරයාට එරෙහිව පැමිණිල්ලක් ඉදිරිපත් කළා.
ඒ අනුව සර්ව පාක්ෂික අරගලකරුවන් සංවිධානය, භික්ෂු පෙරමුණ සහ පිවිතුරු හෙළ උරුමය ආදී පාර්ශවයන් දේවගැතිවරයාට එරෙහිව පැමිණිලි ගොනු කරමින් දේවගැතිවරයාගේ ප්‍රකාශයට සිය විරෝධය පළ කළා.
මේ අතර ජනාධිපති රනිල් වික්‍රමසිංහ මහතා නියෝග කළේ දේවගැතිවරයෙකු විසින් ආගමික සංහිඳියාවට හානි වන අයුරින් ප්‍රකාශයක් කිරීම පිළිබඳ වහාම පරීක්ෂණයක් සිදු කර වාර්තාවක් ලබා දෙන ලෙසයි.
කෙසේ වෙතත් දේවගැති ජෙරම් ප්‍රනාන්දු සිංගප්පූරුව බලා පිටත්ව ගොස් ඇති බව වාර්තා වී තිබෙනවා. ඔහු සිය බිරිඳ සහ දියණියන් දෙදෙනා ද සමඟ කටුනායක ගුවන් තොටුපළින් පිටත්ව ගොස් ඇති බවයි ගුවන් තොටුපල ආරංචි මාර්ග සඳහන් කළේ.