පසුගිය 16 වැනිදා ශ්‍රී ලංකාවට දකුණු දෙසින් වූ ගැඹුරු මුහුදේදී පෙරළීමට ලක් වූ LU PENG YUAN YU 028 නැමැති චීන ධීවර යාත්‍රාවේ කපිතාන්වරයාගේ මැඳිරියෙන් සහ නවාතැන් මැඳිරි ප්‍රදේශයෙන් මළසිරුරු 14 ක් සොයාගෙන තිබේ.
ශ්‍රී ලංකා නාවික නෞකා විජයබාහු ගැඹුරු මුහුදු ආවේක්ෂණ නෞකාවේ කිමිදුම් කණ්ඩායමක් විසින් මෙම මළ සිරුරු සොයාගෙන ඇත.
එමෙන්ම ධීවර යාත්‍රාවේ කාර්ය මණ්ඩලය නවාතැන් ගන්නා කාමර තුළ සහ අනෙකුත් මැඳිරි තුළ නරක්වූ මළසිරුරු 12 ක් ශ්‍රී ලංකා නාවික හමුදා කිමිදුම්කරුවන් විසින් හදුනා ගෙන ඇතත් එම මළසිරුරුවල නරක්වූ ස්වභාවය සහ එම සිරුරු ගොඩ ගැනීමෙන් ශ්‍රී ලංකා නාවික හමුදා කිමිදුම්කරුවන්ට ඇති විය හැකි සෞඛ්‍ය අවදානම සැලකිල්ලට ගෙන එම මළසිරුරු ඇති ස්ථාන සිතියම්ගත කළ නාවික හමුදා කිමිදුම් කණ්ඩායම එම තොරතුරු සහ සිතියම මෙන්ම ඉදිරි සැලසුම් ක්‍රියාත්මක කළ යුතු ආකාරය පිළිබඳව පැහැදිලි කිරීමක් කර තිබේ.