පොසොන් පුර පසළොස්වක පොහොය දිනයේදී (03) සහ ඊයේ (04) දිනයේදී අනුරාධපුර ජය ශ්රී මහා බෝධිය ඇතුළු අටමස්ථානය සහ මිහින්තලා රජ මහා විහාරස්ථානය වන්දනා කිරීමට දිවයිනේ සිවුදෙසින් විසි ලක්ෂයකට අධික සැදැහැවතුන් පිරිසක් පැමිණ ඇති බව පොලිසිය පවසයි.
එම සැදැහැවතුන්ගෙන් ලක්ෂ දොළහකට වැඩි පිරිසක් මිහින්තලා රජ මහා විහාරස්ථානය වන්දනා කිරීමට ගොස් ඇති අතර 2018 වර්ෂයෙන් පසු පොසොන් උත්සව සමයේ අනුරාධපුර සහ මිහින්තලේ සිද්ධස්ථාන වන්දනා කිරීමට පැමිණි වැඩිම සැදැහැවතුන් පිරිස මෙය වන බවයි පොලිසිය පවසන්නේ.
අනුරාධපුරයට සහ මිහින්තලේට පැමිණි ජන ගංගාව හේතුවෙන් පෙරේදා (03) රාත්රි කාලයේ අනුරාධපුර මිහින්තලේ ප්රධාන මාර්ගය සහ අනුරාධපුර නගරයේ සියලු මාර්ගවල දැඩි වාහන තදබදයක් ඇති විය.