රටේ වර්තමානයේ උද්ගතව ඇති ආර්ථික හා සමාජීය තත්ත්වය හමුවේ ළමයින් වැඩි වශයෙන් ශ්‍රමිකයන් ලෙස යොදාගැනීමේ අවදානම් තත්වයක් උද්ගතව ඇති බව ජාතික ළමා ආරක්ෂක අධිකාරිය පවසයි.
ළමා ශ්‍රමිකත්වයට එරෙහි ජාතික දිනය වෙනුවෙන් පණිවුඩයක් නිකුත් කරමින් එම අධිකාරිය සඳහන් කළේ දරුවන් පාසල් හැර යන තත්වයන් උද්ගත වීම, අඛන්ඩව පාසල් නොයැවීම වැනි තත්වයන්ද ඉහළ යාමේ හැකියාව පවතින බවයි.
රටේ පවතින නීතියට අනුව අවුරුදු 16 – 18ත් අතර ළමයින්ගේ ජීවිතයට, සෞඛ්‍යයට, අධ්‍යාපනයට හෝ සදාචාර වර්ධනයට අනතුරුදායක නොවන සේවයන්හි පමණක් ළමයින් යෙදවිය හැකි අතර එම ළමයින් අනාරක්ෂිත රැකියාවල හෝ රාත්‍රී සේවාවන්හි යෙදවීම නීතිවිරෝධී වේ.
කෙසේ වෙතත් පවතින ආර්ථික පීඩනය හමුවේ මුදල් ඉපයීම සඳහා ළමයින් අකමැත්තෙන් හෝ යෙදවීමේ ප්‍රවණතාවක් පවතින බවයි ජාතික ළමා ආරක්ෂක අධිකාරිය වැඩිදුරටත් සඳහන් කළේ.