ශ්‍රී ලංකා පොදුජන පෙරමුණ සහ ජනාධිපතිවරයා අතර කිසිම ගැටුමක් නොමැති බව නාගරික සංවර්ධන සහ නිවාස අමාත්‍ය ප්‍රසන්න රණතුංග පැවසීය.
මෙරට ආර්ථිකය ශක්තිමත් කිරීමට ගත හැකි සියලු ක්‍රියාමාර්ග ජනාධිපති රනිල් වික්‍රමසිංහ විසින් මේ වනවිට ගෙන ඇති බවත් ජනපති සහ පොහොට්ටුව අතර ගැටුමක් තිබෙන බවට උලුප්පා පෙන්වන්නට සමහරුන් උත්සාහ ගන්නා බවත් අමාත්‍යවරයා සඳහන් කළේය.
රනිල් වික්‍රමසිංහ ජනාධිපති ධුරයට පත් කිරීමට ශ්‍රී ලංකා පොදුජන පෙරමුණ සහය ලබා දුන්නේ ඔහුගේ පලපුරුද්ද අභියෝගවලට මුහුණදීමේ හැකියාව ගැන හොඳින් සොයා බැලීමෙන් පසුව මිස ආවට ගියාට නොවන බවයි අමාත්‍යවරයා ප්‍රකාශ කළේ.
ජනාධිපතිවරයා ප්‍රමුඛ ආණ්ඩුව දැනට ක්‍රියාත්මක කරන වැඩපිළිවෙල අනුව මෙරට ආර්ථිකය යථා තත්ත්වයට පත්වනු ඇතැයි ජනතාවගේ දැඩි විශ්වාසයක් පවතින බවද ප්‍රසන්න රණතුංග අවධාරණය කළේය.