ශ්‍රී ලංකා පොදුජන පෙරමුණ ආණ්ඩුවේ කොටසක් ලෙස රැඳී සිටින්නේ තම පක්ෂ නායකයින්ට ලබා දෙන වැදගත්කම මත පමණක් බව රාජ්‍ය අමාත්‍ය සනත් නිශාන්ත පවසනවා.
මාධ්‍ය වෙත අදහස් දක්වමින් ඔහු ප්‍රකාශ කළේ වත්මන් ආණ්ඩුව පත් කර ගැනීම සඳහා වෙහෙස මහන්සි වී වැඩ කළ තම මන්ත්‍රීවරුන්ට අවශ්‍ය පිළිගැනීම ලබා නොදෙන්නේ නම් ශ්‍රී ලංකා පොදුජන පෙරමුණට තවදුරටත් ආණ්ඩුවේ රැඳී සිටීමේ අවශ්‍යතාවක් නොමැති බවයි.
ශ්‍රී ලංකා පොදුජන පෙරමුණේ ජ්‍යෙෂ්ඨ සාමාජිකයින් විසින් ජනාධිපති රනිල් වික්‍රමසිංහ විසින් මෙතෙක් ලබා දී නොමැති කැබිනට් අමාත්‍ය ධුර ඉල්ලා ඇති බව ද වාර්තා වනවා. එවැනි පසුබිමක් මත ශ්‍රී ලංකා පොදුජන පෙරමුණේ මන්ත්‍රීවරුන් පසුගියදා ජනාධිපතිවරයා විසින් කැඳවා තිබූ ආණ්ඩුවේ මන්ත්‍රීවරුන්ගේ රැස්වීම ද වර්ජනය කර තිබුණා.
මාධ්‍ය වෙත අදහස් දක්වමින් රාජ්‍ය අමාත්‍ය සනත් නිශාන්ත එක්සත් ජාතික පක්ෂ හිටපු පාර්ලිමේන්තු මන්ත්‍රී පාලිත රංගේ බණ්ඩාරගේ හැසිරීම දැඩි ලෙස විවේචනය කරමින් කියා සිටියේ තම පක්ෂ නායකයා රාජ්‍ය නායකයා වීම නිසා ඔහුගේ ක්‍රියාකලාපය සිදුවන බවයි.
ශ්‍රී ලංකා පොදුජන පෙරමුණට ජනාධිපතිවරයා පැත්තකට කිරීමට කිසිදු අදහසක් නොමැති බව පවසන පාර්ලිමේන්තු මන්ත්‍රී සනත් නිශාන්ත, කෙසේ වෙතත්, ශ්‍රී ලංකා පොදුජන පෙරමුණ අතහැර දැමීමට උත්සාහ කළහොත් ජනාධිපති රනිල් වික්‍රමසිංහ මහතාට තම සහයෝගය ලබා නොදෙන බවට අනතුරු අඟවනවා.