නව කැලණි පාලම අධි ආරක්ෂිත කලාපයක් ලෙස නම් කිරීමට පාර්ලිමේන්තුවේදී යෝජනාවක් ඉදිරිපත් කර තිබේ.
මත්කුඩුවලට ඇබ්බැහි වූවන් පාලම අනතුරට ලක්වන අයුරින් ඇණ මුරිච්චි ගලවාගෙන යාම හේතුවෙනුයි මෙම යෝජනාව ගෙනවිත් ඇත්තේ.
මීට අමතරව මෙම ප්‍රදේශයට පොලිස්, හමුදා මුර සංචාර හා පොලිස් මුරපොළක් යෙදවීමටත් තීරණය කර ඇති අතර මාර්ග සංවර්ධන අධිකාරියේ නිලධාරින් පෙනවා දී ඇත්තේ කුඩුවලට ඇබ්බැහි වූවන් නව කැලණි පාලමේ යටින් රිංගා දිගින් දිගටම ඇණ ගලවන බවයි.
මෙමගින් නව කැලණි පාලම අනතුරුදායක තත්ත්වයකට පත්විය හැකි බවයි ඔවුහු අවධාරණය කරන්නේ. එමෙන්ම මත්කුඩුවලට ඇබ්බැහි වූවන් කටුනායක අධිවේගී මාර්ගයේත් තඹ කම්බි, ඇණ මුරිච්චි හා විදුලි රැහැන් කපාගෙන යන බව අනාවරණය වී තිබේ.
මාර්ග සංවර්ධන අධිකාරියේ නිලධාරීහු එහිදී වැඩිදුරටත් අවධාරණය කර ඇත්තේ රුපියල් මිලියන 286ක් වටිනා තඹ කම්බි මේ වනවිටත් කපාගෙන ගොස් ඇති බවයි.