පාසල නිමවී නිවස වෙත යමින් සිටි සිසුවෙකු පැහැරගෙන ගොස් තර්ජනය කර පහරදීමේ සිද්ධියක් පිළිබඳ විමර්ශන ආරම්භ වී තිබෙනවා.
පහරකෑමට ලක්වූ සිසුවා කඹුරුපිටිය මූලික රෝහලට ඇතුළත් වී ප්‍රතිකාර ලබාගෙන ඇති බවයි සඳහන්.
තම දියණිය සමග පවතින ප්‍රේම සම්බන්ධතාවය නතර කරන ලෙස තර්ජනය කර මෙම සිසුවාට පහරදී ඇත්තේ අදාළ දැරියගේ මව විසින් බවට හෙළිවී තිබෙනවා.
කඹුරුපිටිය ප්‍රදේශයේ පාසලක ඉගෙනුම ලබන මෙම සිසුවා පසුගිය 20 වනදා පාසල නිමවී නිවසට යමින් සිටියදී පොලිස් කාන්තාවක් ඇතුළු පිරිසක් පැමිණ මෙම සිසුවාගේ පියා හමු වීමට යන බව පවසමින් සිසුවා රවටා ගෙන කඹුරුපිටිය පරණ බස් නැවතුම් පොළ මංසන්ධිය දක්වා රැගෙන ගොස් තිබුණා.
එතැන් සිට මෝටර් රථයක නංවාගෙන කඹුරුපිටිය සතොස අසල පිහිටි අතුරු මාර්ගයකට ගෙන ගොස් තම දියණිය සමග ඇති ප්‍රේම සම්බන්ධය නතර කරන ලෙසට තර්ජනය කර පහරදී ඇති බවයි වාර්තා වන්නේ.
මෙම පහරදීමෙන් පසුව වයස අවුරුදු 15ක් වන පාසල් සිසුවා කඹුරුපිටිය සතොස ආයතනය අසල දමා ගොස් තිබෙනවා.
පසුව සිසුවාගේ දෙමව්පියන් විසින් සිද්ධිය සම්බන්ධව කඹුරුපිටිය පොලිසියට පැමිණිළි කිරීමෙන් පසු දෙපාර්ශවයම කැඳවා විමර්ශනයක් සිදු කර සිද්ධිය සමතයකට පත්කර ගැනීම සඳහා පොලිස් කාන්තාව විසින් රුපියල් දස දහසක මුදලක් ලබාදුන් බව ද සිසුවාගේ පියා පවසනවා.
පහරදීම සම්බන්ධයෙන් චෝදනා එල්ලවන පොලිස් කාන්තාව කඹුරුපිටිය පොලිසියට අනුයුක්තව සේවය කරන අයෙක් බව ද සඳහන්.
මෙම පොලිස් කාන්තාව මීට පෙර අවස්ථාවකදී ද ප්‍රහාරයට ලක් වූ සිසුවාගේ පියාට අයත් ව්‍යාපාරික ස්ථානයට ගොස් චෝදනා කරමින් තර්ජනය කළ බවට ද හෙළිවී තිබෙනවා.
මෙම සිසුවා සාමාන්‍ය පෙළ විභාගයට පෙනී සිටීමට නියමිත අතර ඔහු කඹුරුපිටිය මූලික රෝහලේ ප්‍රතිකාර ලබමින් සිටින බව සිසුවාගේ පියා සඳහන් කළා.
මෙම සිදුවීමසම්බන්ධයෙන් මාතර සහකාර පොලිස් අධිකාරි මහේෂ් පෙරේරා මහතා යටතේ විශේෂ විමර්ශනයක් සිදුකරන බව මාතර කොට්ඨාසය භාර ජ්‍යෙෂ්ඨ පොලිස් අධිකාරී පණ්ඩුල වීරසිංහ මහතා ප්‍රකාශ කර තිබෙනවා.