මත්ද්‍රව්‍ය චෝදනාවක් සම්බන්ධයෙන් කුවේට්හිදී එල්ලා මැරූ ශ්‍රී ලාංකිකයෙකුගේ දේහය බාර ගැනීමට ඔහුගේ බිරින්දෑවරුන් බව පවසමින් කාන්තාවන් තිදෙනෙකු ඉදිරිපත් වී තිබේ.
ඔහුගේ මරණයට අදාළ මරණ පරීක්ෂණය මීගමුව රෝහලේදී ඊයේ (02) සිදුකිරීමට පියවර ගනු ලැබූ අතර එහිදී ඇතිවූ උණුසුම් තත්ත්වය හේතුවෙන් අදාළ දේහය පිළිබඳ මරණ පරීක්ෂණ කටයුතු අද (03) දිනය දක්වා කල්දැමීමට රෝහල් බලධාරීන් පියවර ගත්තේය.
මෙලෙස ඉදිරිපත්වී ඇති කාන්තාවන් තිදෙනාගෙන් එක් තැනැත්තියක් ඕමානයේ රැකියාවේ නියුතු තැනැත්තියක් වන අතර ඇය සඳහන් කර ඇත්තේ ඔහු සමග විවාහ වී වසර 17ක් පමණ වන බවත් ඇය දරුවන් දෙදෙනෙකුගේ මවක් බවත්ය.
කෙසේවෙතත් මියගිය අයගේ බිරින්දෑවරුන් කියන අයගේ අනන්‍යතාව තහවරු කර විවාහ සහතිකය සහ දරුවන්ගේ උප්පැන්න සහතික සමග පරීක්ෂා කර අද ඉදිරි කටයුතු සිදු කිරීමට නියමිතය.