ඝාතනය කරන ලද බවට සැකකෙරෙන කාන්තාවකගේ මළ සිරුරක් අක්මීමන, හියාරේ ප්‍රදේශයේ නිවසක තිබී සොයාගෙන තිබෙනවා.
මෙලෙස සොයාගෙන ඇත්තේ වයස අවුරුදු 65ක පමණ කන්තාවකගේ මළ සිරුරක් වන අතර, ඇය හියාරේ ප්‍රදේශයේ පදිංචිව සිටි තැනැත්තියක් බවයි අක්මීමන පොලිසිය සඳහන් කළේ.
අදාළ කාන්තාව නිවසේ තනිව ජීවත්ව ඇති අතර, ඊයේ (05) රාත්‍රියේ ඇයගේ දියණියක් නිවසට පැමිණ බැලීමේ දී සිය මව මියගොස් ඇති බව දැක තිබෙනවා.
මේ සම්බන්ධයෙන් පොලිසියට දැනුම්දීමෙන් පසු සිදුකළ විමර්ශනවල දී අනාවරණය වී ඇත්තේ ඇය පැළඳ සිටි මාලය, කරාඹු යුගළය කිසිවෙකු විසින් ගලවාගෙන ගොස් ඇති බවයි.
එමෙන්ම ඇයගේ මුහුණේ ද තුවාල සිදුව ඇති බවට නිරීක්ෂණය වූ බව පොලිසිය සඳහන් කළා.
සිද්ධිය සම්බන්ධයෙන් වන මහේස්ත්‍රාත් පරීක්ෂණය ඊයේ (05) රාත්‍රියේ ම සිදුකර ඇති අතර, මෘත ශරීරය කරාපිටිය රෝහල වෙත යොමුකර තිබෙනවා.
මේ අතර රාගම දුම්රිය ස්ථානය ඉදිරිපිට තිබී නාඳුනන මළ සිරුරක් පොලිසිය විසින් ඊයේ (05) සොයා ගත්තා.
මෙලෙස සොයාගෙන ඇත්තේ අවුරුදු 65ත් 70ත් අතර වයසේ පසුවන අයෙකුගේ මළ සිරුරක් බවයි පොලිසිය සඳහන් කළේ.