ශ්‍රී ලංකාව සදහා වන ජාතික හයිඩ්‍රජන් මාර්ග සිතියම විදුලිබල හා බලශක්ති අමාත්‍යාංශයේ දී පසුගිය දා එළි දැක්විණි.
මෙරට ඛනිජ තෙල් සංවර්ධන අධිකාරිය සහ ඉන්දියානු ග්‍රීන්ස්ටන්ට් හයිඩ්‍රජන් ආයතනය එක්ව පිළියෙල කළ මෙම සැලසුම සඳහා ජාත්‍යන්තර සබඳතා සඳහා වන අමෙරිකානු ඒජන්සියේ (USAID) සහයෝගය ලබාදී තිබේ.
බලශක්ති සුරක්ෂිතභාවය සහ බලශක්ති ස්වාධීනත්වය, බලශක්තිය බෙදීයාමේ සමානාත්වය සහ අවම මිලකට බලශක්තිය මිලදී ගැනීමට අවස්ථාව උදා කිරීම මෙන්ම ඉන්ධන භාවිතයෙන් සිදුවන පාරිසරික බලපෑම් අවම කිරීම යන කරුණු සාක්ෂාත් කිරීම සදහා හරිත හයිඩ්‍රජන් වැඩසටහනේ අවශ්‍යතාව රජය අවබෝධ කරගෙන ඇති බව විදුලිබල හා බල ශක්ති අමාත්‍ය කාංචන විජේසේකර මහතා පවසයි.
සූර්ය සහ සුළං ප්‍රභව මගින් පුනර්ජනනීය බලශක්ති උත්පාදනය කර හරිත හයිඩ්‍රජන් නිෂ්පාදනය කිරීමේ හැකියාව ශ්‍රී ලංකාවට පවතින අතර එමගින් කාබන් උදාසීනත්ව ඉලක්ක, පුනර්ජනනීය බලශක්ති ඉලක්ක, පාරිසරික ඉලක්ක සහ දේශගුණ විපර්යාස අවම කිරීමේ ඉලක්ක වෙනුවෙන් දායකත්වය ලබා දිය හැක.
පසුගිය සතියේදී එලිදැක්වූ අක්වෙලරල සුලං බලශක්ති මාර්ග සිතියම සමඟ ද ඒකාබද්ධ වෙමින් හරිත හයිඩ්‍රජන් පරිවර්තනයක් වෙනුවෙන් වැඩපිළිවෙළක් ක්‍රියාත්මක කිරීමට රජය කටයුතු කරනු ඇති බව විදුලිබල හා බල ශක්ති අමාත්‍යවරයා සඳහන් කරයි.