කාන්තාවක් සමඟ කෙටි පණිවිඩ හුවමාරු කරගත් පුද්ගලයකු පැහැර ගෙන ගොස් ඝාතනය කිරීමේ සිදුවීමට එම කාන්තාව සහ ඇයගේ සැමියා ඇතුළු පස් දෙනෙකු සපුගස්කන්ද පොලිසිය විසින් අත්අඩංගුවට ගෙන තිබෙනවා.
මුහුණු පොත හරහා හඳුනා ගෙන ඇති මෙම ඝාතනයට ලක්වූ විසි එක් හැවිරිදි පුද්ගලයා විසින් කාන්තාව සමග කෙටි පණිවිඩ හුවමාරු කරගෙන තිබූ බව විමර්ශන වලදී හෙළිවී තිබෙනවා.
පසුගිය අප්‍රේල් මස 19 වැනි දින කාන්තාවගේ සැමියා ඇතුළු පිරිස මෙම තරුණයා පැහැරගෙන ගොස් පහර දී පමුණුවිල කනත්ත ඉදිරිපිට දමා ගොස් තිබෙනවා. පහර දීමෙන් බරපතළ තුවාල ලැබූ ඔහු රෝහල්ගත කර සිටියදී මියගොස් තිබූ බව පොලිසිය අනාවරණය කරනවා.
මෙලෙස ඝාතනයට ලක්වූ පුද්ගලයා විසි එක් හැවිරිදි බඹරගම පල්ලේබෝවල ප්‍රදේශයේ පදිංචි කරුවෙක් බව වාර්තා වෙනවා.