විමර්ශන කටයුතු සඳහා ගොඩගනු ලැබූ ව්‍යාපාරික දිනේෂ් ශාෆ්ටර්ගේ මෘත ශරීරය යළි ඔහුගේ ඥාතීන් වෙත භාරදීමට පියවර ගන්නා ලෙස කොළඹ මහේස්ත්‍රාත් අධිකරණය අද (25) නියෝග කළා.
ශාෆ්ටර්ගේ මරණයට හේතු සෙවීම සඳහා පත් කරනු ලැබූ විශේෂඥ වෛද්‍ය මණ්ඩලය විසින් එම පරීක්ෂණ කටයුතු අවසන් කර ඇති බවත් අදාළ මෘත ශරීරය මුදාහැරීමට හැකියාව තිබෙන බවටත් අධිකරණයට දැනුම් දී තිබුණා.
එම කරුණු කෙරෙහි අවදානය යොමුකළ කොළඹ අතිරේක මහේස්ත්‍රාත් රජින්ද්‍ර ජයසූරිය මහත්මිය එම මෘත ශරීරය දිනේෂ් ශාෆ්ටර්ගේ ඥාතීන් වෙත භාරදීමට පියවර ගන්නා ලෙස නියෝග කළා.
මෙම මරණ පරීක්ෂණය අද (25) කැඳවනු ලැබූ අවස්ථාවේ දී මියගිය දිනේෂ් ශාෆ්ටර්ගේ පියා වන චන්ද්‍රා ශාෆ්ටර් වෙනුවෙන් පෙනී සිටි ජනාධිපති නීතිඥ සාලිය පීරිස් අධිකරණය හමුවේ කරුණු දක්වමින් මෙම මරණකරුගේ මරණය සයනයිඩ් විෂ ශරීරගත වීමෙන් සිදු වී ඇති බවට අධිකරණ වෛද්‍ය රුහුල් හක් විසින් නිකුත් කළ වාර්තාවක සඳහන් කර තිබූ බව පැවසුවා.
එහෙත් මරණකරුගේ ඇඳුම්වල තැවරී තිබූ වමනය සාම්පල රජයේ රස පරීක්ෂකවරයා වෙත යොමු කර වාර්තාවක් කැඳවීමට පියවර ගත් අතර, එම වමනය සාම්පලවල සයනයිඩ් අන්තර්ගතව තිබූ බවක් රජයේ රස පරීක්ෂක වාර්තාවේ සඳහන් නොවන බව ජනාධිපති නීතීඥ සාලිය පීරිස් පෙන්වා දුන්නා.
එමෙන්ම මෙම මරණකරුගේ මෘත ශරීරය සම්බන්ධයෙන් ගනු ලැබූ ඡායාරූපවල ඔහුගේ ශරීරයේ යම් යම් තුවාල තිබෙන බව දක්නට තිබුණත් එම තුවාල පිළිබඳව අධිකරණ වෛද්‍ය රුහුල් හක් විසින් සිය වාර්තාවේ ඉදිරිපත් කිරීමේදී සැලකිල්ලට ගෙන නොමැති බවත් ජනාධිපති නීතිඥවරයා සඳහන් කළා.
ඊට අමතරව මෙම මරණකරු සම්බන්ධයෙන් විශේෂඥ වෛද්‍ය නීල් ප්‍රනාන්දු විසින් ඉදිරිපත් කළ වෝහාරික මනෝ වෛද්‍ය වාර්තාව පදනම් විරහිත පිළිගත නොහැකි වාර්තාවක් යැයි සඳහන් කළ ජනාධිපති නීතිඥ සාලිය පීරිස් එහි අන්තර්ගත කරුණු මරණකරුගේ මානසික තත්ත්වය නිරූපණය නොකරන බවටත් සඳහන් කර සිටියා.
ඒ අනුව දැනට සිදුකර තිබෙන අධිකරණ වෛද්‍ය පරීක්ෂණය සම්බන්ධයෙන් තම සේවාදායකයා සෑහීමකට පත් නොවන බවත් තමන් විසින් අද දින ඉදිරිපත් කරන ලද කරුණු විමර්ශනයට පාදක කරගන්නා ලෙසත් ජනාධිපති නීතිඥ සාලිය පීරිස් අධිකරණයෙන් ඉල්ලීම් කළා.
එම කරුණු කෙරෙහි අවධානය යොමු කළ අතිරේක මහේස්ත්‍රාත්වරිය කියා සිටියේ ජනාධිපති නීතිඥවරයා විසින් ඉදිරිපත් කළ කරුණු දැනටමත් ශාෆ්ටර්ගේ මරණයට හේතු සෙවීම සඳහා පත් කරනු ලැබූ මහාචාර්ය අසේල මෙන්ඩිස්ගේ ප්‍රධානත්වයෙන් යුත් විශේෂඥ කමිටුවේ අවධානයට යොමු වී තිබෙන බවයි.
කෙසේ වෙතත් අවශ්‍ය වුවහොත් මෙම කරුණු ඉදිරි විමර්ශනවලට ඉදිරිපත් කළ ලෙසත් මහේස්ත්‍රාත්වරිය ජනාධිපති නීතිඥවරයාට සඳහන් කර සිටියා.
වැඩි දුරටත් විවෘත අධිකරණය කරුණු දැක්වූ අතිරේක මහෙස්ත්‍රාත්වරිය ශාෆ්ටර්ගේ මරණයට හේතු සෙවීම සඳහා අධිකරණය විසින් නම් කරනු ලැබූ මහාචාර්ය අසේල මෙන්ඩිස්ගේ ප්‍රධානත්වයෙන් යුත් විශේෂඥ වෛද්‍ය කමිටුව සිය අධිකරණ පරීක්ෂණ කටයුතු අවසන් කර ඇති බව අධිකරණයට දැනුම් දී තිබෙන බවත් කියා සිටියා.
ඒ අනුව මරණකරුගේ දේහය මුදාහැරීම සඳහා නියෝගයක් නිකුත් කරන ලෙසත් එම කමිටුව අධිකරණයෙන් ඉල්ලීම් කර තිබෙන බව ද මහේස්ත්‍රාත්වරිය පැවසුවා.
ඒ අනුව නැවත ගොඩගන්නා ලද ශාෆ්ටර්ගේ මෘතදේහය මහාචාර්ය ක්ලිෆර්ඩ් පෙරේරා සහ අධිකරණ වෛද්‍ය පී. ආර්. රුවන්පුර යන මහත්වරුන්ගේ අධීක්ෂණය යටතේ ඔහුගේ ඥාතීන් වෙත මුදාහැරීමට පියවර ගන්නා ලෙස මහේස්ත්‍රාත්වරිය විසින් නියෝගයක් නිකුත් කළා.
ඉන් අනතුරුව පැමිණිල්ල නැවත ඔක්තෝබර් මස 09 වනදා කැඳවන ලෙසත් මහෙස්ත්‍රාත්වරිය නියෝග කර සිටියා.