අයහපත් කාලගුණ තත්වය හේතුවෙන් ගාල්ල වැලිවත්ත විජයානන්ද මාවතේ නිවසක් මතට අද (05) පෙරවරුවේ ගලක් පෙරලීමෙන් නිවසේ නිදා සිටි නිවෙස් හිමියා මියගොස් තිබෙනවා.
මෙම අනතුරින් නිවසටද දැඩි අලාභ හානි සිදුව ඇති බවයි ගාල්ල දිස්ත්‍රික් ලේකම් කාර්යාලය සඳහන් කළේ.
මියගොස් ඇත්තේ විශ්‍රාමිකයෙක් වන 78 හැවිරිදි පුද්ගලයෙක් වන අතර අනතුර සිදුවන විට ඔහුගේ බිරිඳ සහ පුතාද නිවසේ සිට තිබෙනවා.
මෙම පුද්ගලයා අද උදෑසන පිබිදී මුහුණ සෝදා, තේ පානය කර, යළිත් ඇඳෙහි වැතිර සිටියදී කාමරයට විශාල ගලක් පෙරළීමෙන් මෙම අනතුර සිදුව ඇතැයි සඳහන්.
ඒ සමගම මියගිය අයගේ පුත්‍රයා සහ අසල්වාසින් ඔහු රෝහලට රැගෙන ගොස් තිබුණද එහිදී මියගොස් ඇති බවටයි අනාවරණ වී ඇත්තේ.
ජාතික ගොඩනැගිලි පර්යේෂණ ආයතනයේ ඊ.ආර්.බන්දුල ගල පෙරලුන ස්ථානය නිරීක්ෂණය කර කියා සිටියේ එම ස්ථානයේ තිබෙන අනෙක් ගල්ද අනතුරුදායක බවයි.
