මංගල කාන්තා පාපන්දු ලෝක කුසලානය ජයග්‍රහණය කිරීමේ ප්‍රීතිය නමැති පීල්ල ලෝක පාපන්දු සම්මේලනයේ හිටපු සභාපති ලුයිස් රුබියල්ස්ගේ අනවශ්‍ය දෙතොල් හාදුව හේතුවෙන් පීලි පැනීමකට ලක් වූ බව FIFA හි මහලේකම් Fatma Samoura පවසනවා.
ඇය පෙන්වාදෙන්නේ ස්පාඤ්ඤ ක්‍රීඩිකාවන්ගේ ශූරත්වය සම්බන්ධයෙන් නොව, අද වනවිටත් ක්‍රීඩා ලොවේ බොහෝ විට මාතෘකාව වී ඇත්තේ ජෙනිෆර් හර්මෝසෝ ක්‍රීඩිකාවට සිදු වූ ලිංගික අතවරය සහ බලහත්කාරකම පිළිබඳ ව බවයි.
හිටපු පාපන්දු සම්මේලනයේ සභාපතිවරයාගේ අයහපත් හැසිරීම් රටාව තරගාවලියේ ම හානියට අර්ධ වශයෙන් හෝ දායක වූ බවද මහලේකම්වරිය ෆත්මා කියා සිටියා.
පසුගියදා ලන්ඩනයේදී නිමාවට පත් වූ අප්‍රිකානු සම්මාන උලෙළේ දී CNN ජ්‍යෙෂ්ඨ ක්‍රීඩා විශ්ලේෂක ඩැරන් ලුවිස් හා සංවාදයකට එක්වෙමින් ෆත්මා සමූරා පැවසුවේ ලුයිස්ගේ ක්‍රියාකලාපය නුසුදුස්සක් බවට තීරණය කිරීමට තමන්ට තත්ත්පරයක් හෝ ගත නොවූ බවයි.
FIFA හි පළමු කාන්තාව සහ පළමු අප්‍රිකානු මහලේකම්වරිය වන එක්සත් ජාතීන්ගේ හිටපු රාජ්‍ය තාන්ත්‍රික සැමෝරා වැඩිදුරටත් මෙසේ ද සඳහන් කළා.
ක්‍රීඩාවට කැමති මෙන්ම කාන්තාවන්ගේ ගෞරවයට ගරු කරන ගෝලීය බහුතර ජනතාවක් සිටින බවට හර්මෝසෝට සිදු වූ අසාධාරණයත් සමග පෙරට ආ පාර්ශ්ව වෙතින් දිස්වීම සතුටට කරුණක් බවයි.
පසුගිය අගෝස්තු මාසයේ දී එංගලන්ත කාන්තා පාපන්දු කණ්ඩායම පරදවමින් ස්පාඤ්ඤ කාන්තාවන් සිය මංගල පාපන්දු ලෝක කුසලානය ජයග්‍රහණය කළා.
එම ජයග්‍රහණයේ පදක්කම් සහ කුසලානය ප්‍රදානයෙන් පසුව හිටපු පාපන්දු සම්මේලනයේ සභාපති රුබියල්ස් ස්පාඤ්ඤ ක්‍රීඩිකා ජෙනිෆර් හර්මෝසෝගේ දෙතොල් ඇයගේ අවාරයකින් තොරව සිප ගත්තා.
මෙම සිදුවීම පාපන්දු ක්‍රීඩාවේ විනය රීති බ‍රපතළ ලෙස උල්ලංඝනය කිරීමක් බවත් හර්මෝසෝගේ අනවසරයකින් තොරව සිදු වූ නිසා එය බලහත්කාර ලිංගික අත පෙවීමක් බවත් ගෝලීය වශයෙන් විවිධ පාර්ශ්ව කියා සිටියා.
මෙවන් පසුබිමක් මතයි හර්මෝසෝ විසින් සිය නීතිඥවරයාගේ මාර්ගයෙන් රාජකීය ස්පාඤ්ඤ අධිකරණයේ රුබියල්ස්ට එරෙහිව නඩු මගට පිවිසුණේ. ඒ සමගින් රුබියල්ස් සිය පාපන්දු සභාපති ධුරයෙන් ඉල්ලා අස්වීමට ද කටයුතු කළා.
ජාත්‍යන්තර පාපන්දු සම්මේලනය විසින් මාස 06ක කාලයක් සඳහා ද පරීක්ෂණ අවසන් වන තුරු රුබියල්ස්ට ක්‍රීඩාව සම්බන්ධයෙන් ඇති සියලුම කටයුතුවලින් ඉවත් වන ලෙසටත් වාරණ නියෝගයක් නිකුත් කෙරුණා.