වැලිකඩ සිරකරු ඝාතන නඩුවේ මරණීය දණ්ඩනය නියම වී සිටින විත්තිකාර හිටපු බන්ධනාගාර කොමසාරිස් ජෙනරාල්වරයා අධිකරණයට ඉදිරිපත් කරන ලෙස නියෝග කර තිබෙනවා.
2012 වසරේ වැලිකඩ බන්ධනාගාරය තුළ ඇති වූ ගැටුම්වලින් සිරකරුවන් පිරිසක් මරණයට පත්වීමේ සිද්ධියට අදාළ ව මරණීය දණ්ඩනය නියම වී සිටින හිටපු බන්ධනාගාර කොමසාරිස් එමිල් රංජන් ළමාහේවා ලබන 15 වනදා අධිකරණය හමුවට ඉදිරිපත් කිරීමට පියවර ගන්නා ලෙසයි ශ්‍රේෂ්ඨාධිකරණය අද බන්ධනාගාර බලධාරීන්ට නියම කළේ.
තමන්ට පනවා තිබෙන මරණීය දණ්ඩනයෙන් තමන් ව නිදොස්කොට නිදහස් කරන ලෙස ඉල්ලා හිටපු බන්ධනාගාර කොමසාරිස්වරයා විසින් ඉදිරිපත් කළ අභියාචනා පෙත්සම අද කැඳවනු ලැබූ අවස්ථාවේ දී මෙම නියෝගය නිකුත් කෙරුණා.
මෙම අභියාචනා පෙත්සම අද විජිත් මළල්ගොඩ, එස්. තුරෙයිරාජා, ශිරාන් ගුණරත්න, අචල වෙංගප්පූලි සහ ප්‍රියන්ත ප්‍රනාන්දු යන විනිසුරුවරුන්ගෙන් සමන්විත පංච පුද්ගල ශ්‍රේෂ්ඨාධිකරණ විනිසුරු මඩුල්ලක් ඉදිරියේ කැඳවනු ලැබුවා.
එහිදී විත්තිකාර හිටපු බන්ධනාගාර කොමසාරිස්වරයා වෙනුවෙන් පෙනී සිටි ජනාධිපති නීතිඥ අනිල් සිල්වා අධිකරණය හමුවේ කරුණු දක්වමින් මෙම නඩු විභාගය සඳහා බන්ධනාගාරගත ව සිටින සිය සේවාදායකයා අධිකරණය හමුවට කැඳවා ඔහු ඉදිරියේ මෙම විභාගය පවත්වන ලෙස ඉල්ලා සිටියා.
ඒ අනුව අභියාචනා විභාගය ලබන 15 වනදා දක්වා කල් දැමූ පංච පුද්ගල ශ්‍රේෂ්ඨාධිකරණ විනිසුරු මඩුල්ල එදින විත්තිකාර අභියාචක එමිල් රංජන් ළමාහේවා අධිකරණය හමුවට ඉදිරිපත් කරන ලෙසත් බන්ධනාගාර බලධාරීන්ට නියෝග කළා.
2012 වසරේ නොවැම්බර් මස වැලිකඩ බන්ධනාගාරය තුළ ඇති වූ කැරැල්ලකින් ‘කොණ්ඩ අමිල’ නමැති සිරකරුවකු මරණයට පත්වීමේ සිද්ධියට අදාළ ව වරදකරු කෙරුණු හිටපු බන්ධනාගාර කොමසාරිස් එමිල් රංජන් ළමාහේවාට කොළඹ ත්‍රිපුද්ගල මහාධිකරණ විනිසුරු මඩුල්ලක් විසින් මරණීය දණ්ඩනය නියම කළා.
තමාට එම දඬුවම නියම කර තිබෙන ආකාරය නීතියට පටහැනි බවත් එබැවින් තමන් ව එම චෝදනාවලින් නිදොස් කොට නිදහස් කරන ලෙසත් ඉල්ලමින් විත්තිකරු විසින් මෙම අභියාචනා පෙත්සම ඉදිරිපත් කරනු ලැබුවා.