පසුගිය වසරේ කිරි අල ඇතුළු මෙරට වැවෙන බෝග කිහිපයක් ගෙන්වීම සඳහා ඩොලර් මිලියන 295 ක් වැය කොට ඇති බව පොදුජන පෙරමුණේ කොළඹ දිස්ත්‍රික් මන්ත්‍රී මධුර විතානගේ පැවසීය.
හෙතෙම මේ බව සඳහන් කළේ අද (20) පාර්ලිමේන්තුවේදී අදහස් දක්වමිනි.
එහිදී වැඩිදුරටත් අදහස් දක්වමින් මන්ත්‍රීවරයා කියා සිටියේ සුදු ලූනු, අල, කජු, ගොරකා, තක්කාලි, ගස්ලබු කොමඩු, කිරි අල, අන්නාසි ,මෑ කරල්, කජු ආදිය මෙලෙස ඩොලර් වැය කර ගෙන්වා ඇති බවයි.
අමාත්‍යංශ වලට ජනපති වෙන් කළ මුදල්වලින් තමන්ගේ යුතුකම ඉටුකරන්නැයි මන්ත්‍රීවරයා එහිදී ඉල්ලා සිටියේය.
එමෙන්ම මහ පොළොවේ වැවෙන බෝග ටික වවා ගන්නේ නැතිව පොළොව යට තියෙන ඛනිජ ගැන සෙවීමෙන් වැඩක් නැතැයි කී මන්ත්‍රීවරයා අවධාරණය කළේ කිරි අල, මඤ්ඤොක්කා ගෙනැවිත් රටේ තිබෙන ඩොලර් පිටරට වෙත යවන්න උත්සාහ කරනවා නම් එය සැමගේ අවාසනාව බවයි.