මුරුත්තෙට්ටුවේ ආනන්ද හිමියන්ගේ නාරාහේන්පිට අභයාරාම විහාරස්ථානයේත් විදුලිය විසන්ධි කිරීමට පැමිණ ඇති බව විපක්ෂ නායක සජිත් ප්‍රේමදාස අද (04) පාර්ලිමේන්තුවේ දී සඳහන් කළා.
මේ අතර මෙරට බොහෝ නිවාස සඳහා මේ වනවිට විදුලිය විසන්ධි කිරීමේ රතු නිවේදන යවා ඇති බවයි විපක්ෂ නායකවරයා වැඩිදුරටත් සඳහන් කර සිටියේ.
මේ දිනවල ජලවිදුලි උත්පාදනය ඉතා ඉහළ ගොස් ඇති බවත්, විදුලිබල මණ්ඩලය කෝටි ප්‍රකෝටි ගණන් ලාභ ලබන බවත් ඔහු පාර්ලිමේන්තුවේ දී වැඩිදුරටත් පැවසුවා.
මේ අතර නාරාහේන්පිට අභයාරාම විහාරස්ථානයේ විදුලිය විසන්ධි කිරීම සම්බන්ධයෙන් අදහස් දක්වා සිටි මුරුත්තෙට්ටුවේ ආනන්ද හිමියන් සඳහන් කළේ පසුගිය සෙනසුරාදා දිනයේදී විහාරස්ථානයේ විදුලිය විසන්ධි කර තිබූ බවයි.
කිසිදු දැනුම්දීමකින් තොරව මෙලෙස විහාරස්ථානයේ විදුලිය විසන්ධි කර තිබූ බවයි උන්වහන්සේ වැඩිදුරටත් සඳහන් කළේ. රුපියල් 6,000 වැනි මුදලක් ගෙවීමට තිබූ බවත් රතු බිලක් පන්සලට නොපැමිණි බවත් මුරුත්තෙට්ටුවේ ආනන්ද හිමියන් වැඩිදුරටත් පැවසුවා.
මේ සම්බන්ධයෙන් වහාම පරීක්ෂණයක් පවත්වන ලෙසයි අභයාරාමාධිපති මුරුත්තෙට්ටුවේ ආනන්ද ස්වාමීන් වහන්සේ ප්‍රකාශ කළේ.