ශ්‍රී ලංකාව විශ්වවිද්‍යාල කේන්ද්‍රස්ථානයක් බවට පත්කළ යුතු බව ජනාධිපති රනිල් වික්‍රමසිංහ පවසයි.
ජනධිපතිවරයා මේ බව සඳහන් කළේ අද (11) ජාතික ව්‍යාපාර අධ්‍යයන විද්‍යායතනයේ උපාධි ප්‍රදානෝත්සවයට එක්වෙමිනි.
එහිදී වැඩිදුරටත් අදහස් දක්වමින් ජනාධිපතිවරයා කියා සිටියේ විශ්වවිද්‍යාල අධ්‍යාපනය සහ වෘත්තීය පුහුණු අධ්‍යාපනය රටේ දියුණුවට යොදා ගැනීමේ වැඩපිළිවෙළ ලබන වසරේ ආරම්භ කරන බවයි.
එමෙන්ම රට දියුණුව කරා ගෙනයාමට නම් දැනුම ඇති මානව සම්පතක් අවශ්‍ය බවත් ඒ අනුව එහි වගකීම මෙරට විශ්වවිද්‍යාල ක්ෂේත්‍රයට සහ වෘත්තීය පුහුණු ක්ෂේත්‍රයට පැවරෙන බවත් ජනාධිපතිවරයා අවධාරණය කළා.
වෘත්තීය පුහුණු අධ්‍යාපන ක්ෂේත්‍රයේ නව පරිවර්තනයක් වෙනුවෙන් පෞද්ගලික අංශයේ සහාය මේ වන විට පළවි තිබෙන බවත් මෙරට සමස්ත අධ්‍යාපන ක්‍රමය ප්‍රතිසංවිධානයට අවශ්‍ය නීති කඩිනමින් ගෙන එන බවත් ජනාධිපතිවරයා ප්‍රකාශ කළා.
විශ්වවිද්‍යාලවලින් පිටවන සියලු දෙනාට රැකියා ලබාගත හැකි ආකාරයට විශ්වවිද්‍යාල අධ්‍යාපනය පරිවර්තනය කළ යුතු බවයි ජනාධිපතිවරයා කියා සිටියේ.