රටට අත්‍යවශ්‍යම පනත් 8ක් ලබන ජනවාරි මාසයේදී සම්මත කර ගන්නා බව අධිකරණ, බන්ධනාගාර කටයුතු හා ව්‍යවස්ථා ප්‍රතිසංස්කරණ අමාත්‍ය විජයදාස රාජපක්‍ෂ පැවසීය.
ඊයේ (28) රජයේ ප්‍රවෘත්ති දෙපාර්තමේන්තුවේ පැවති සාකච්ඡාවකදීයි අමාත්‍යවරයා මේ බව ප්‍රකාශ කළේ.
එහිදී වැඩිදුරටත් අදහස් දක්වමින් අමාත්‍යවරයා කියා සිටියේ අවශ්‍යතා අනුව ඉදිරියේදී නව පනත් සංශෝධනය කිරීමට කටයුතු කරන බවත් ඉකුත් මාස 18ක කාලය තුළ නීති අණපනත් 45ක් සංශෝධනය කරමින් නව නීති සකස් කළ බවත්ය.
රටේ නාස්තිය හා දූෂණය අවම කිරීමට අවශ්‍ය ක්‍රියාමාර්ග ගැනීම සඳහා මේ වන විට සම්මත කර තිබෙන පනත් ප්‍රමාණවත් බව පැවසූ ඇමතිවරයා අදාළ පනත් හරහා නීතිය නිසියාකාරව ක්‍රියාත්මක කිරීම තුළින් රට වඩාත් යහපත් තත්ත්වයකට පත් කිරීමට හැකියාව ලැබෙන බව සඳහන් කළේය.