චීනයේ යෝධ පැන්ඩා යුවලක් ළඟදීම වොෂින්ටන් හි ස්මිත්සෝනියන් ජාතික සත්වෝද්‍යානයට පැමිණීමට නියමිත බව එම සත්වෝද්‍යානය නිවේදනය කර තිබෙනවා.
ඒ අනුව අවුරුදු දෙකක පිරිමි පැන්ඩාවකු වන බාඕ ලී (Bao Li) සහ අවුරුදු දෙකක ගැහැණු පැන්ඩාවකු වන කුයින්ග් බාඕ (Qing Bao) මේ වසර අගදී එක්සත් ජනපද අගනුවරට පැමිණීමට නියමිතයි.
මෙම පැන්ඩාවන්ගේ පැමිණීම, ජනාධිපති ආර්යා ජිල් බයිඩ්න් ඉදිරිපත් කරන වීඩියෝවක් සමඟ ප්‍රකාශයට පත් කර ඇති අතර ඇය එය හඳුන්වා ඇත්තේ ඓතිහාසික මොහොතක් ලෙසින්.
මෙම පියවර එක්සත් ජනපදය සමඟ චීනයේ පැන්ඩා සත්වයින් පිළිබඳ රාජ්‍ය තාන්ත්‍රික දිගු ඉතිහාසයේ නවතම පරිච්ඡේදය සනිටුහන් කරනවා.
නමුත් දෙරට අතර සබඳතා නොසන්සුන්වී ඇති අවස්ථාවක මෙලෙස පැන්ඩා පැටවුන් ලබා දීමත් විශේෂත්වයක්.
කෙසේ වෙතත්, මීට මාස හයකට පෙර අමෙරිකාවට ලබාදුන් පැන්ඩාවන් තිදෙනෙකුගෙන් යුත් පවුලක් ජාතික සත්වෝද්‍යානයේ සිට චීනයට ආපසු ගෙන යනු ලැබුවා.