හිටපු අමාත්‍ය විජිත් විජයමුණි සොයිසාට අනිද්දා වලාන දූෂණ මර්දන ප්‍රහාරක ඒකකය වෙත පැමිණෙන ලෙස දැනුම් දී තිබෙනවා. එකළස් කරන ලද බවට සැකකෙරෙන ට්‍රක් රථයක් සම්බන්ධයෙන් සිදු කෙරෙන විමර්ශනයකට අදාළවයි මෙම කැඳවීම සිදු කර ඇත්තේ.
වලාන දූෂණ මර්දන ප්‍රහාරක ඒකකය විසින් පසුගිය මාසයේදී හපුතලේ ප්‍රදේශයෙන් මෙම සැක සහිත ට්‍රක් රථය සොයාගෙන ඇති අතර, ඒ පිළිබඳව බණ්ඩාරවෙල අධිකරණය දැනුවත් කිරීමට පොලිසිය පියවර ගෙන තිබේ.
මීට පෙර, පසුගිය අඟහරුවාදා දින හිටපු අමාත්‍යවරයා මේ සම්බන්ධයෙන් ප්‍රකාශයක් ලබාදීම සඳහා වලාන දූෂණ මර්දන ප්‍රහාරක ඒකකය වෙත පැමිණ සිටියේය. එහෙත් ප්‍රකාශය ලබාගැනීම ආරම්භ කිරීමෙන් අනතුරුව, තමන්ට හදිසි අසනීප තත්ත්වයක් ඇති බව පවසමින් ඔහු එම ස්ථානයෙන් පිටව ගොස් ඇති බව වාර්තා වී තිබේ.