රුපියල් එක්කෝටි විසිනව ලක්ෂ අසූනව දහසක් වටිනා තෙන්දු කොළ කිලෝ එක්දහස් අටසිය විසි හතයි ග්‍රෑම් 200ක් ළඟ තබා ගත් අයෙකු අත්අඩංගුවට ගත් බව හලාවත සුරාබදු කාර්යාලය සඳහන් කරනවා.
තම කාර්යාලයට පෞද්ගලික ඔත්තුකරුවකුගෙන් ලද තොරතුරක් මත කොච්චිකඩේ පේරුතොට ප්‍රදේශයේදී මෙම වැටලීම සිදුකර තිබෙනවා.
සූක්ෂ්ම අයුරින් පාර්සල් 48ක මේ කොළ අසුරා තිබී ඇති අතර ඒවා වෙනත් ස්ථානයකට ප්‍රවාහනය කිරීමට ලොරි රථයකට පටවමින් සිටි බව ද සුරාබදු කාර්යාලය සඳහන් කරනවා.
මේවා නීති විරෝධී අයුරින් ආනයනය කොට රජයට විශාල බදු මුදලක් අහිමි කරමින් ජාවාරමේ නිරත වන බව කී සුරාබදු කාර්යාලය සඳහන් කළේ, සමථ කිරීම සඳහා සුරාබදු කොමසාරිස් ජනරාල්වරයා වෙත ඉදිරිපත් කිරීමෙන් පසු රුපියල් ලක්ෂ 5 සමථ ගාස්තුවක් අය කරගත් බවයි.
තෙන්දු කොළ තොගය වෙන්දේසි කිරීමටත් අදාළ ලොරි රථය සම්බන්ධයෙන් ඉදිරියේදී නීතිමය ක්‍රියාමාර්ග ගැනීමත් සිදු කරන බව සුරාබදු කාර්යාලය වැඩිදුරටත් සඳහන් කරනවා.
වයඹ පළාත් සහකාර සුරාබදු කොමසාරිස් උපාලි ජයසිංහ මහතාගේ උපදෙස් මත නාත්තණ්ඩිය සුරාබදු අධිකාරි ඒ.ආර්. ලැම්බට් මහතාගේ අධීක්ෂණයෙන් හලාවත සුරාබදු ස්ථානාධිපති දනුෂික තිලකරත්න මහතාගේ මෙහෙයවීමෙන් සුරාබදු පරීක්ෂක එස්.බී. වලිසුන්දර සුරාබදු නියාමක සම්පත් පුංචිහේවා, සුරාබදු නියාමක රියැදුරු සුදත් ප්‍රියංකර යන මහත්වරු වැටලීමට එක්ව සිටියා.