පිරිවෙන් අධ්‍යාපනය ආරක්ෂා කිරීමට රජය ලබාදුන් සහයෝගය අඛණ්ඩවම ලබාදෙන බව අග්‍රාමාත්‍ය දිනේෂ් ගුණවර්ධන පවසනවා.
සීතාවකපුර නගර සභා ශාලාවේ දී පැවති උත්සවයකට ඊයේ (07) එක්වෙමින් අග්‍රාමාත්‍යවරයා මේ බව සඳහන් කළා.
මෙහිදී තවදුරටත් අදහස් දැක්වූ අග්‍රාමාත්‍යවරයා පැවසූයේ අපේ රටේ බුදු දහම සමඟ වෙනත් ආගම් පැවතියත් එම ආගම් සමඟ කිසිඳු ගැටළුවක් නොමැති බවයි.
එසේ වුව ද සම්බුද්ධ ශාසනයේ කොඳු නාරටිය මතින් ජාතියේ අන්‍යනයතාවය ගොඩනැගීමත් ශිෂ්ඨාචාරය ආරක්ෂාවීමත් සිදු වූ බවයි ඔහු සඳහන් කළේ.
ලෝකයේ පොහොසත් යැයි කියාගන්නා රටවල සිට අමාරුකමින් ජීවත්වන රටවල් දක්වා, අනුකරණවාදී විසඳුම් කරා ගමන් කිරීම හේතුවෙන් සමාජ අර්බුධයන් බවට පත්ව ඇති බව පැවසූ අග්‍රාමාත්‍යවරයා බුදු දහම ලෝකය සහ රජයට ඇති වගකීම් ඇතුළු කරුණු කිහිපයක් ගැන අදහස් දක්වා සිටියා.
මෙරට පිරිවෙන් ගුරු භවතුන් පුහුණු කිරීම සඳහා ඇති ප්‍රථම සහ එකම ආයතනය වන සීතාවක පිරිවෙන් ගුරු අභ්‍යාස විද්‍යාලයයේ 2015/2016, 2017/2018 සහ 2019/2020 යන වර්ෂවලදී ගුරු පුහුණුව සාර්ථකව නිමකළ පිරිවෙන් ගුරු ස්වාමීන්වහන්සේලා වෙත සහතික පත්‍ර ප්‍රදානය කිරීම සඳහා මෙම උත්සවය සංවිධානය කර තිබුණා.
වසර 67 ක ඉතිහාසය තුළ මෙම පිරිවෙන් ගුරු අභ්‍යාස විද්‍යාලය විසින් සංවිධානය කළ දෙවන නිල ප්‍රවීනාචාර්ය සහතික පත්‍ර ප්‍රදානෝත්සවය මෙය වන අතර, අවසන් වරට එවැනි උත්සවයක් පවත්වා තිබුණේ 2016 වසරේදීයි.