මුදල් අමාත්‍යවරයාට අවශ්‍යව ඇත්තේ අර්බුදය උත්සන්න කර රට ඉතාමත්ම ව්‍යවසනකාරී තත්ත්වයකට ඇද දමා බටහිර උපාය මාර්ගයට රට ගොදුරු කිරීම බවද ජාතික නිදහස් පෙරමුණේ නායක විමල් වීරවංශ පවසයි.
ඔහු මේ බව ප්‍රකාශ කළේ අද (07) කොළඹ මහේස්ත්‍රාත් අධිකරණයේ පැවති නඩු කැඳවීමකට පැමිණි අවස්ථාවේදී මාධ්‍යවේදීන් ඉදිරියේදීය.
ඉන්ධන හිඟයක් ඇති වීමට හිටපු බලශක්ති අමාත්‍යවරයා කළ ප්‍රකාශ හේතු වූ බවට ආණ්ඩුවේ ඇතැමුන් කරන ප්‍රකාශ පිළිබඳව කනගාටු වන බවත් ඉදිරියේදී ඉන්ධන හිඟය සියයට 100ක් නැති කර පෙන්වන ලෙස තමා ආණ්ඩුවට අභියෝග කරන බවත් ඔහු එහිදී අවධාරණය කළේය.
ඉන්ධන සහ ගෑස් හිඟයට හේතු වූයේ ඒවා ආනයනය කිරීමට අවශ්‍ය ණයවර ලිපි විවෘත කිරීමට රට සතුව ඩොලර් නොමැති වීම හේතුවෙන් බවත් මෙම මස 5 වැනිදායින් පසුව විදුලිය නොකපන බව කීවද අද දිනයේදීත් විදුලිය කප්පාදු කරන අතර ගෑස් හිඟය උග්‍රවෙමින් පවතින බවත් ඔහු එහිදී ප්‍රකාශ කළේය.