ලබන සතියේ පාර්ලිමේන්තුවේදී ජනාධිපතිවරයාට හා ආණ්ඩුවට එරෙහිව විශ්වාසභංග යෝජනා ගෙන එන බව සමගි ජන බලවේගයේ පාර්ලිමේන්තු මන්ත්‍රී මනෝ ගනේෂන් පැවසීය.
ඔහු මේ බව ප්‍රකාශ කළේ අද (28) පාර්ලිමේන්තුවේදී පැවති පක්ෂ නායක හමුවෙන් අනතුරුව මාධ්‍ය වෙත අදහස් දක්වමිනි.
වාසුදේව නානායක්කාර යනු මාක්ස්වාදයත් පාවා දුන් අයෙක් වන අතර දැන් ඔහු කළ යුත්තේ ඔළුව පරීක්ෂා කර ගැනීම බවත් මනෝ ගනේෂන් එහිදී ප්‍රකාශ කළේය.
සජිත් ප්‍රේමදාස ආණ්ඩුව සමඟ වූ එකඟතාවක් නිසා ආණ්ඩුවට එරෙහි විශ්වාසභංග යෝජනාව ගෙන නොඑන බවට වාසුදේව නානායක්කාර මන්ත්‍රීවරයා විසින් කර තිබුණු ප්‍රකාශයට ප්‍රතිචාර දක්වමින් හෙතෙම මේ බව සඳහන් කළේය.