නාගරික සංවර්ධන හා නිවාස අමාත්‍ය ප්‍රසන්න රණතුංග හිටපු අග්‍රාමාත්‍ය මහින්ද රාජපක්ෂගේ ප්‍රධානත්වයෙන් අද (27) පුත්තලම, ආරච්චිකට්ටුවේ පැවැත්වෙන ‘එක්ව නැඟිටිමු’ ශ්‍රී ලංකා පොදුජන පෙරමුණු ජන රැළියට එක් වී තිබේ.
පසුගිය සතියේදී අමාත්‍යවරයා ශ්‍රී ලංකා පොදුජන පෙරමුණ අත්හැර එක්සත් ජාතික පක්ෂය සමඟ එක්වන බවට නොයෙක් කටකතාද පැතිරෙමින් යන අවස්ථාවක මොහු මෙලෙස පොහොට්ටුවේ ජන රැලියට එක්වීම විශේෂත්වයකි.
මෙම ජනරැළිය සංවිධානය කර ඇත්තේ පසුගිය මැයි 09 වැනිදා ගිනි තබා විනාශ කරන ලද රාජ්‍ය අමාත්‍ය සනත් නිශාන්තගේ නිවස පිහිටි ස්ථානයේය.
ජන රැළියට සහභාවීමට පෙර ඇමතිවරයා නියෝජ්‍ය කතානායක අජිත් රාජපක්ෂ, රාජ්‍ය අමාත්‍ය සනත් නිශාන්ත, හිටපු අමාත්‍යවරුන් වන ගාමිණි ලොකුගේ, නාමල් රාජපක්ෂ, පාර්ලිමේන්තු මන්ත්‍රීවරුන් වන මධුර විතානගේ, සම්පත් අතුකෝරළ ඇතුළු පිරිස සමඟ විශේෂ සාකච්ඡාවකද නිරත වී තිබේ.
කෙසේවෙතත් අමාත්‍ය ප්‍රසන්න රණතුංග පවසන්නේ මේ මොහොතේ රනිල් වික්‍රමසිංහ ජනාධිපතිවරයාට සහාය පළකිරීම පොහොට්ටුව හැර යාමක් නොවන බව හා ජනාධිපතිවරයාට සහාය පළකිරීම අලියා පිටේ නැඟීමක් නොවන බවයි.