අප රට අපායක් බවට පරිවර්තනය කළ පොහොට්ටු ආණ්ඩුව රනිල් වික්‍රමසිංහ ජනාධිපතිවරයාගේ පිහිටෙන් නැවතත් නැගිටීමට උත්සාහ කරන බවත් රට විනාශ කළ රාජපක්ෂවරුන්ට නැවත දේශපාලන බලය ලබා ගැනීමට ලැජ්ජා නැද්දැයි තමා අසන බවත් විපක්ෂ නායක සජිත් ප්‍රේමදාස පැවසීය.
හෙතෙම මේ බව ප්‍රකාශ කළේ ඊයේ (08) බටහිර අනුරාධපුර ආසන බලමණ්ඩලයේ පැවැති රැස්වීමකට එක්වෙමිනි.
“දිව්‍ය ලෝකයක් වූ අපේ රට අපායක් බවට පරිවර්තනය කළ පොහොට්ටු ආණ්ඩුව රනිල් වික්‍රමසිංහ ජනාධිපතිවරයාගේ පිහිටෙන් නැවතත් නැගිටීමට උත්සාහ කරනවා. රට විනාශ කළ රාජපක්ෂවරුන්ට නැවත දේශපාලන බලය ලබා ගැනීමට ලැජ්ජා නැද්ද කියලා මං අහන්න කැමතියි. එළඹෙන මැතිවරණයකදී රට විනාශ කළ රාජපක්ෂ පවුලට සහ පොහොට්ටුවට මතක හිටින පිළිතුරක් ලබා දීමට ජනතාව සූදානම්.
විවිධ කොමිෂන් සභා පත්කර මැතිවරණය කල් දැමීමට උත්සාහ කළත් ජනතාව ඉල්ලා සිටින්නේ මැතිවරණයක්. එම නිසා එම සීමා නිර්ණය කොමිසමේ සභාපති මහින්ද දේශප්‍රිය මහතාගෙන් ඉල්ලා සිටින්නේ ඔබ හොඳ සමාජවාදියකු නම් මැතිවරණ කල් නොදමා වහාම මැතිවරණයක් පැවැත්වීමට කටයුතු කළ යුතු බවයි. ආණ්ඩුවේ මැතිවරණ කල් දැමීමේ කුමන්ත්‍රණයේ කොටස් කරුවකු නොවන ලෙස මං ඔබතුමාගෙන් ඉල්ලා සිටිනවා.
එසේ ම වසර 11ක් කන්න 22ක් වී ගොවිතැන පිළිබඳ බතලේගොඩ පර්යේෂණ ආයතනය විසින් පර්යේෂණයක් සිදු කර ලබා ගත් තොරතුරු අනුව වී ගොවිතැනට කාබනික පොහොරම යොදා ගත හොත් වී ගොවිතැනේ අස්වැන්න සියයට 21.5 සිට 31 දක්වා අඩු වන බව අනාවරණය වුණා. ඊට අමතරව වී අස්වැන්න උපරිම තලයට ගත හැකි ක්‍රමවේදය වන්නේ රසායනික සහ කාබනික පොහොරවල සම්මිශ්‍රණයෙන් වී ගොවිතැනයි. මේ සියලු දත්ත අනාවරණය කර ගත්තේ දේශපාලනඥයන් නෙවෙයි මෙරට සිටින විද්‍යාඥයනුයි. එසේ වුවත් ගෝඨාභය රාජපක්ෂ ආණ්ඩුව විසින් මේ වාර්තා ගණන් නොගෙන හිතුමතේට ගන්නා තීන්දු තීරණයක් නිසා වී ගොවිතැන, හේන් ගොවිතැන, පළතුරු වගාව ආදී සියලු වගාවන්ට ලබා දුන් පොහොර ආදිය තහනම් කළා. මේ තුළින් කෘෂිකර්මයේ නියැලී සිටි ගොවි ජනතාවගේ ජීවිත විනාශ වුණා. ඒ නිසා පහුගිය මාස් කන්නයේ අස්වැන්න සියයට 50කින් පහළ ගියා.”