මධ්‍යම කඳුකරයේ බටහිර බෑවුම් ප්‍රදේශවල පවතින අධික වියළි කාලගුණයත් සමග බගවන්තලාව සහ හැටන් දික්ඔය ප්‍රදේශයේ රක්ෂිත දෙකක අද (08) ගින්නක් හටගෙන ඇති බව නුවරඑලිය දිස්ත්‍රික් ආපදා කලමණාකරණ ඒකකය පවසයි.
බගවන්තලාව පොලිස් වසමට අයත් චැපල්ටන් වත්තට පහළින් කෙසෙල්ගමු ඔයට ආසන්නයේ පිහිටි තෙත්බිම් කලාපයක හටගත් ගින්නකින් අක්කර 03ක පමණ රක්ෂිතයේ කොටසක් ගිනිගෙන විනාශ වී ඇත.
මේ අතර කාසල්රී ජලාශයට මායිම්ව පිහිටි හැටන් වනරාජා වත්ත පහළ කොටසේ ඉලුක් සහිත රක්ෂිතයක හටගත් ගින්නකින් අක්කර 05ක පමණ කොටසක් ගිනිගෙන විනාශ වී ඇත.
කාසල්රී ජලාශයට මායිම් පිහිටි එම රක්ෂිතයේ හටගත් ගින්නෙන් වනරාජා වත්ත පහළ කොටසේ වතු කම්කරුවන් පානීය ජලය ලබා ගැනීම සදහා එම රක්ෂිතය හරහා ඇද තිබූ ජල නලද ගින්නෙන් විනාශ වී තිබේ.