සංචාරක කර්මාන්තය නංවාලීමට සාම්ප්‍රදායික ක්‍රමවලින් මිදිය යුතු බවත් මළ නගරවලට (Dead Cities) සංචාරකයන් නොපැමිණෙන බවත් සංචාරක රාජ්‍ය අමාත්‍ය ඩයනා ගමගේ පැවසුවාය.
රාජ්‍ය අමාත්‍යවරිය මේ බව ප්‍රකාශ කළේ ඊයේ (01) ‘ස්ථාවර රටකට සැවොම එක මඟකට’ මැයෙන් ජනාධිපති මාධ්‍ය කේන්ද්‍රයේ පැවති ප්‍රවෘත්ති සාකච්ඡාවට එක්වෙමිනි.
“සංචාරක ව්‍යාපාරය නංවාලීමට නම් රාත්‍රී ආර්ථික ක්‍රමවේදයකට (Night Economy) යා යුතුයි. සංචාරකයෙක්ගේ ගමනාන්ත වන්නේ නිදහසේ සංචාරකයින්ට ජීවිතය විඳ ගැනීමට අවශ්‍ය පහසුකම් ලබාදීමේ ස්ථානයයි. එම නිසා සංචාරක ගමනාන්තයක් වන ස්ථාන රාත්‍රිය 10.00ට වහනවා නම් සංචාරකයින් පැමිණෙන්නේ නැහැ. මළ නගරවලට (Dead Cities) සංචාරකයෝ කොහොමත් පැමිණෙන්නේ නෑ. එම නිසා අපේ වෙරළ විඳින්න, සංචාරකයන්ට රාත්‍රිය පුරාම වෙරළේ ගත කිරීමට අවස්ථාව සලසා දිය යුතුයි. ඒ සඳහා නීති සකස් කළ යුතුයි.”