පල්ලම, නන්දිමිත්‍ර නව වංගු රජමහා විහාරයෙන් රුපියල් 250,000 මුදලක් සොරකම් කළ සැකකරුවෙකු සහ සැකකාරියක් අත්අඩංගුවට ගෙන තිබේ.
පල්ලම පොලීසියට ලද තොරතුරක් මත ආඩියාගම ප්‍රදේශයේදී ඊයේ (16) එම සැකකරුවන් අත්අඩංගුවට ගෙන ඇත. එලෙස අත්අඩංගුවට ගත් සැකකරු සහ සැකකාරිය වයස අවුරදු 40 හා 22ක් වූ උඩුබද්දාව ප්‍රදේශයේ පදිංචිකරුවන්ය.
සැකකරුවන් විසින් සොරාගන්නා ලද මුදලින් රුපියල් 40,900 සොයාගෙන ඇත. එම සැකකරු හා සැකකාරියගෙන් ප්‍රශ්න කිරීමේදී රස්නායකපුර, මහකුඹුක්කඩවල හා කොබෙයිගනේ යන පොලිස් වසම්වල විහාරස්ථානවලද මුදල් සහ දේපළ සොරා ගැනීමේ අපරාධ ගණනාවක් සිදුකර ඇති බවට තොරතුරු අනාවරණය වී තිබේ.
ඔවුන් දෙදෙනා අද (17) ආණමඩුව මහෙස්ත්‍රාත් අධිකරණය වෙත ඉදිරිපත් කිරීමට නියමිතය. පල්ලම පොලීසිය වැඩිදුර විමර්ශන සිදුකරයි.