බස්නාහිර ප්රධාන පෙළේ නගරයක පිහිටි ඔසුසලක් පිට පිටම දෙදිනක් සොරුන් බිඳ බෙහෙත් හා කිරිපිටි රැගෙන යාමේ සිද්ධියක් වාර්තා වේ.
ඔසුසල් හිමියා විසින් ඔසුසල ආරක්ෂා කර ගැනීම සඳහා ස්වයං ආරක්ෂණ වැඩපිළිවෙලක් යොදා ඇති අතර පළමු දිනයේ වහලයෙන් ඇතුළු වූ සොරුන් බෙහෙත් අල්මාරියක තිබූ මත්කුඩුවලට ඇබ්බැහි වූවන් සඳහා පමණක්ම නිකුත් කරන බෙහෙත් වර්ගයක විශාල ප්රමාණයක් රැගෙන ගොස් ඇත.
මෙහි අයිතිකරු පාඩුව විඳ දරාගන්නා අදහසින් පොලීසියට පැමිණිල්ලක් කර නැත.
එදින දහවල් වෙළඳ කටයුතු සිදු කර නිවසට ගිය සේවක පිරිස පසුදින උදේ ඔසු සල විවෘත කිරීමේදී පෙරදින රාත්රියේ යළිත් වතාවක් සොරු බිඳ ඇති බව හෙළි වී ඇත.
ඒ අවස්ථාවේ සිදු කෙරුණු පරීක්ෂාවේදී දැනගන්නට ලැබී ඇත්තේ කිරි පිටි පැකට් තොගයක් රැගෙන ගොස් ඇති බවයි. වටිනාකමින් වැඩි කිරිපිටි වර්ග රැසක් තිබියදී මෙසේ සොරාගෙන ගොස් ඇත්තේ වටිනාකමින් අඩු කිරිපිටි වර්ග බවද එහිදී දක්නට ලැබී ඇත.