මේ වන විට පවතින මිල ගණන් යටතේ ලබන දෙසැම්බර් මාසය දක්වා ඉන්ධන ලබාදීම සිදු කළහොත් ලංකා ඛනිජ තෙල් සංස්ථාවට මහ බැංකුවෙන් සහ මුදල් අමාත්‍යාංශයෙන් අමෙරිකානු ඩොලර් මිලියන 550ක මුදලක් ලබා ගැනීමට අවශ්‍ය වන බව බලශක්ති අමාත්‍ය කාංචන විජේසේකර පවසයි.
පසුගිය අප්‍රේල් 18 වැනිදා සිදුකළ ඉන්ධන මිල සංශෝධනයෙන් පසුවත් ලංකා ඛනිජ තෙල් නීතිගත සංස්ථාව පාඩු ලබන බව අමාත්‍යවරයා සඳහන් කළේය.
මෙරට ජනතාවට භූමිතෙල් ලීටරයක් රුපියල් 87කට ලබාදීමට රජය පියවර ගත්තද, භූමිතෙල් ලීටරයක් සඳහා රජයට වැය වන මුදල් රුපියල් 313ක් බවත් ඩීසල් සහ පෙට්‍රල් සඳහා රජය තවමත් ජනතාවට සහනාධාර ලබාදෙමින් සිටින බවත් අමාත්‍යවරයා පැවසීය.
මේ හේතුවෙන් ලබන පාඩුව අවම කිරීමට සහ ඉදිරියේදී ඉන්ධන මිලදී ගැනීම සඳහා අවශ්‍ය කටයුතු සලසා ගැනීම සඳහා LIOC සමාගම සහ CPC සමාගම කැබිනට් මණ්ඩලයට විනිවිදභාවයකින් යුතු මිල සූත්‍රයක් හඳුන්වා දීමට කටයුතු කරන බව බලශක්ති අමාත්‍ය කාංචන විජේසේකර සඳහන් කළේය.